ПО РАСПРАВИЈА ГО НАПАДНАЛЕ СОСЕДОТ СО ТВРДИ ПРЕДМЕТИ - уапсени две лица од Кочани за убиство

Добивај вести на Viber

Две лица од Кочани се уапсени и се теретат за убиство на нивниот сосед. 

Како што соопштуваат од Министерството за внатрешни работи, од страна на полициските екипи од Кочани поднесена е кривична пријава против две лица со иницијали Ѓ.Б. и Љ.С. од Кочани, поради основи на сомнение за сторено кривично дело убиство. 

МВР соопшти дека лицето Ѓ.Б. вчера пријавило во ОВР Кочани дека во дом во Кочани го пронашол мртов неговиот сосед Д.А. од Кочани, при што од страна на екипа од Итната медицинска помош била констатирана смрт со видливи траги на насилство. 

Во службен разговор Љ.С. признал дека претходната вечер заедно со Ѓ.Б. биле во домот на нивниот сосед Д.А. каде настанала расправија, по што со тврди предмети го удирале Д.А.

- На 06.09.2024 во 7.43 часот Ѓ.Б. пријавил во ОВР Кочани дека во дом во Кочани го пронашол мртов  неговиот сосед Д.А. (54) од Кочани. Од страна на екипа од Итна медицинска помош била констатирана смрт со видливи траги на насилство, а од страна на ОВР Кочани во координација со јавен обвинител од ОЈО Кочани веднаш се преземени мерки и активности за расчистување  на случајот. 

При тоа, во службен разговор Љ.С. признал дека Ѓ.Б. и Љ.С. претходната вечер биле во домот на нивниот сосед Д.А. и консумирале алкохол, по што настанала расправија и го удирале Д.А. со тврди предмети. Ѓ.Б. и Љ.С. се лишени од слобода и со кривична пријава предадени на ОЈО Кочани за понатамошно постапување - стои во соопштението на МВР.

Јавното обвинителство на Република Северна Македонија соопшти дека ОЈО Кочани веќе има издадено наредба за спроведување истражна постапка против двајцата осомничени дека како соизвршители извршиле кривично дело – Убиство според член 123 став 1 во врска со член 22 од Кривичниот законик.

По наредба на јавен обвинител, на телото на починатиот е извршена обдукција, а од лице место се прибрани траги и материјални докази кои се предмет на вештачења.

Јавниот обвинител до судијата на претходна постапка достави предлог за определување мерка притвор за двајцата осомничени. Кочанскиот суд го прифати предлогот и им определи притвор од по 30 дена.