Почина најистакнатиот македонски историчар и еден од творците на независна Македонија

Добивај вести на Viber

Блаже Ристовски, креаторот на првата македонска енциклопедија во издание на МАНУ, почина на 87 годишна возраст.

Најпознатиот македонски историчар беше потпретседател во првата влада на Република Македонија кога премиер беше Никола Кљусев.

Има објавено неколку десетици научни дела,а во Македонија беше консултиран речиси за сите важни историски процеси и феномени, а своевремено е и директен учесник како партизан во МОБ.

Академик Блаже Ристовски е роден на 21 март 1931 година во с. Гарниково, Кавадаречко. 

Неговиот научноистражувачки интерес беше насочен кон истражување и афирмација на националните дејци од XIX и XX век – Крсте П. Мисирков, Димитрија Чуповски, Ѓорѓија Пулевски, Петар Драганов, Марко Цепенков, Кочо Рацин, Васил Икономов, Наце Димов и други. 

Собраните дела на Крсте Мисирков претставуваат еден од најзначајните проекти на академик Блаже Ристовски во Македонската академија на науките и уметностите.

Погребот на академик Блаже Ристовски ќе се изврши на Градските гробишта „Бутел“ во Скопје утре, во 13 часот, а посмртните останки ќе бидат изложени во Капелата од 12 до 13 часот.

Утре во 10.30 часот во Свечената сала на Македонската академија на науките и уметностите ќе се одржи Комеморативна седница.