Подравка атакува на Алкалоид, воздржаност во скопската фармација!

Добивај вести на Viber

Една од најголемите хрватски прехранбени компании, Подравка, планира аквизиции на Балканот, меѓу кои и фармацевтската компанија Алкалоид во Македонија, објавува Хрватски “Пословни дневник“. Од Алкалоид за Фактор велат дека ќе се воздржат од коментар Хрватска Подравка, втората по големина прехранбена компанија во оваа земја го мерка македонски Алкалоид, објави хрватскиот весник “Пословни дневник“. Според информациите, Подравка планира аквизиции во земјите од регионот за што е подготвена да плати околу 200 милиони евра. Оваа информација ја презеде и “Блумберг бизнисвик“  кој цитира дека покрај Алкалоид, Подравка сака да ги купи и српските компании Алева и Бамби Банат, попозната по брендот Плазма. Претседателот на Управниот одбор на Подравка, Звонимир Мршиќ, потврдува дека за денес е закажана седница на Надзорниот одбор на компанијата без да прецизира дали се точни плановите за преземање на Алкалоид, Бамби, Алеа... На утрешната седница треба да се донесе планот за работа за 2013 година, но и петгодишната стратегија во која Подравка ги проектира приходите на дури пет милијарди куни (близу 700 милиони евра). “Зголемувањето на моменталните приходи од околу 3,7 милијарди куни за нови 1,5 милијарди куни до 2017 година, е можно само преку аквизиции. Според неофицијалните информации, Подравка планира 15 аквизиции, главно во регионот. Најверојатно можат да се обноват и преговорите за стратешкото поврзување со македонската фармацевтска компанија Алкалоид, кои се водеа и во текот на 2011 година. Неофицијалните информации покажуваат  и дека најверојатно Подравка цели и на компании кои се занимаваат со производство на храна за деца, а на мета е и српска Бамби, за која компанијата се интересираше неколкупати до сега. Преговорите со сопственикот на Бамби, Салфорд, пропаднаа пред неколку години поради превисоката цена“, објави “Пословни дневник“. Од Алкалоид за Фактор велат дека за сега немаат коментар. Ваквите информации Подравка експресно ги демантираше на Загребската берза, оквалификувајќи ги како шпекулации, но со дополнение дека се ќе биде појасно денес, по седницата на надзорниот одбор. Инаку, Алкалоид е присутен на хрватскиот пазар со децении преку своите брендови како Бекутан, кафетин... Само Бекутан е препознатлив за хрватските потрошувачи речиси 30 годиони. Во конкуренција од 1.000 домашни и странски брендови, македонскиот бренд Бекутан беше избран за супербренд на хрватскиот пазар за 2009 година. К.П.