ПОМАЛИТЕ ПАРТИИ ЗА ИВАНОВ: Едни бараат притворање, други ќе го прогласат за непосакувана личност

Добивај вести на Viber

Повеќе партии излегоа со став дека претседателот, Ѓорѓе Иванов треба да ја смени својата одлука и да го даде мандатот на лидерот на СДСМ, Зоран Заев за формирање на влада. 

ПДП ќе им предложи на сите албански партии во Македонија да потпишат заеднички меморандум со кој ќе го прогласат Иванов за непосакувана личност за нив.

„Со чинот на недавање мандат за составување на влада преку неговото наивно образложение и негирање на Платформата на албанските политички партии, лицето Иванов уште еднаш докажа дека Уставот за него не претставува ништо туку прогласите на неговата политичка партија се закон и Устав. ПДП уште еднаш го потсетува лицето Иванов дека не е тој туку Уставниот суд согласно член 31 од Законот за политички партии кој е надлежен да покрене судски спор во случај кога политичката платформа на некоја политичка партија не е во склад со уставните норми. ПДП го повикува лицето Иванов да се вразуми и да ги почитува пријателските препораки на Стејт Департментот, препораките на Комисијата на ЕУ, на Комисарот Хан и да го врачи мандатот на Зоран Заев“ - наведуваат од ПДП. 

Партијата за целосна еманципација на Ромите (ПЦЕР) најостро ја осудува вчерашната одлука на, како што вели, таканаречениот претседател да не го даде мандатот за формирање влада на лидерот на СДСМ, Зоран Заев.

„Ваквото негово образложение е спротивно на Уставот на Македонија, според нашата партија претседателот направи државен удар и веднаш треба да се притвори. Во една правна држава ова веднаш би се применило. Не може претседател да презема и да донесува одлуки надвор од своите ингеренции. Веднаш по притворањето треба да се установи кои се причините за донесување на одлуките надвор од Уставот на Македонија“- се наведува во реакцијата на ПЦЕР.

Со одлуката да не му го додели мандатот за составување Влада на предводникот на опозицијата, претседателот Ѓорге Иванов, безобѕирно го погази Уставот на РМ и дадената заклетва и „избриша“ повеќе од 612.000 граѓани на сопствената држава, реагира Партијата на обединетите пензионери и граѓани на Македонија (ПОПГМ).

ПОПГМ со презир ја осудува одлуката на претседателот Иванов да не му го додели мандатот за составување Влада на предводникот на опозицијата.