Понудата на Груевски до Заев, СДСМ ја оцени како евтин трик

Добивај вести на Viber

 Откако Зоран Заев ги доби потребните потписи за добивање мандат за составување влада, Никола Груевски му упати јавна понуда дека ВМРО –ДПМНЕ ќе ја поддржи малцинската влада на СДСМ, но само ако не коалицираат со албанскиот политички кампус, оти нивниот договор водел кон редефенирање на државата. 

Од СДСМ возвратија дека лагите за наводни редефинирања, федерализации и кантонизации на државата се последица на стравот од соочување со правдата која доаѓа. 

Понудата на Груевски пак за опозицијата и за дел од полтичките аналитичари се смета за евтин трик, особено ако се знае дека и ВМРО-ДПМНЕ преговараше за истата платформа и истите барања на албанскиот политички кампус, а токму од ДУИ соопштија дека единственото нешто околу кое не се согласиле со ВМРО-ДПМНЕ за да формираат влада е само продолжувањето на мандатот на Специјалното јавно обвинителство. 

Политичките аналитичари сметаат и дека сега Груевски се обидува да се претстави како жртва пред граѓаните, па затоа посочува дека е подготвен да оди и во затвор ако треба, но бара да се зачува унитарноста на државата. 

„Му порачувам на Заев и му давам јасна понуда, доколку по секоја цена е решен да стане премиер и доколку цената треба да се работи кои ќе им направат штета на темелите на државата, дека лично му нудам доколку албанските партии го донесат на власт, ако се откаже од спроведувањето на таа агенда, ќе му дадеме поддршка да биде малцинска влада во период во кој ќе се договориме, и ќе има поддршка за сите закони освен оние за редефинирање на државата, кои се понижување на другите етнички заедници, изјави Груевски. 

Но, Груевски не застана тука па го повика и народот да ја одбрани државата бидејќи Заев со помош на странски сили сака не само да ја федерализира, туку крајната цел е и промена на името, па токму затоа, според Груевски некој сака да го симне него од власт и да го донесе Заев. 

„Една порака до граѓаните, ако седат и планираат со седење дома некој друг дека ќе им ја одбрани државата се во заблуда. Само народот може да ја одбрани“, изјави Груевски. 

Сепак, ако СДСМ формираа влада, со албанскиот политички кампус, Груевски се закани дека во партијата имаат стратегија како со тоа ќе се справат но, детали не обелодени. 

„Ние секако имаме стратегија, секојдневно дебатираме и ја разглобуваме таа стратегија. 

Имаме различни планови направено, како планови кои произлегуваат од таа стратегија, но во овој момент не можам да ви ги соопштам, рече претседателот на ВМРО-ДПМНЕ, Никола Груевски. 

На сите овие обвинувања од лидерот на ВМРО-ДПМНЕ, од СДСМ возвртија дека ниту една лага на Груевски неможе да спречи државата да чекори кон подобра иднина. 

„Никола Груевски цели десет години злосторнички се однесуваше кон Македонија и нејзините национални и стратешки интереси. Груевски и неговите најблиски соработници ќе одговараат пред институциите на системот за грабежот, криминалот, корупцијата, личните, професионални и семејни трагедии што им ги нанесоа на граѓаните на Република Македонија, посочија од СДСМ. СДСМ, ги доби потребните потписи за да го добие мандатот од претседателот на државата Горѓе Иванов, но како тој ќе постапи засега е неизвесно, иако и ЕУ и НАТО, упатија јасни пораки дека Иванов треба да му го даде мандатот за составуување на влада на Зоран Заев.