Потпретседателот на Собранието му „забрани“ на Никола Груевски да поднесе оставка
Објавено во: Македонија 01 Јуни, 2019
Горан Мисовски, потпретседателот на Собранието, му порача на поранешниот премиер Никола Груевски дека не може да си поднесе оставка како пратеник во законодавниот дом онака како што си замислува тој, туку дека треба лично да дојде.
„Читам Груевски ќе си поднел оставка. Членот 65 од Уставот на РСМ е многу јасен: Пратеникот може да поднесе оставка. Пратеникот оставката ја поднесува лично на седница на Собранието. НИКОЛА ТЕ ЧЕКАМЕ ВО РСМ!“, напиша Мисовски попладнево на својот профил на „Фејсбук“.
Сегашниот азилант Груевски преку својот фејсбук профил најави дека се повлекува од функцијата пратеник во Собранието на РСМ. Како што пишува екс премиерот, за тоа во наредните денови ќе биде известен формално правно и законодавниот дом.