„ПОТРЕБНО Е ЗАЕДНИЧКО ДЕЛУВАЊЕ ЗА ДА ИМ СЕ ПОМОГНЕ НА ГРАЃАНИТЕ“: Тренчевска бара прифаќање на предлозите на СДСМ за „брз резултат“

Добивај вести на Viber

Се потврди тоа што го говоревме и што граѓаните го гледаат секој ден - нема намалување на цените во маркетите, владината мерка не даде резултат.

Ова го истакна денеска Јована Тренчевска, пратеничка од редовите на СДСМ и поранешна министерка за труд и социјални работи. 

Таа посочи дека според податоците коишто ги објави Државниот завод за статистика цените на мало во месец октомври се намалиле за само 0,1 процент.

- Ова значи дека намалување на цени нема и затоа пратениците на ВМРО-ДПМНЕ и Владата треба итно да ги прифатат пакет законските решенија на СДСМ: да се усвои Законот за зголемување на минималната плата на 450 евра. Да се усвои Законот за укинување на ДДВ за храната со кој граѓаните ќе заштедат и до 2.000 денари месечно. Итна да се примени Законот за нефер трговски практики за спречување на нов раст на цените. Овие пакет решенија на СДСМ ќе значат намалување на цените, зголемување на платите односно повеќе пари за граѓаните и семејните буџети - нагласи Тренчевска.

Воедно посочи дека СДСМ уште еднаш повикува да проработи разумот кај власта, пред се кај пратениците од ВМРО-ДПМНЕ. 

- Подаваме рака за соработка, за подобар животен стандард и поддршка на граѓаните во време кога нивниот живот станува се потежок.

Просечната плата во земјата е намалена за 1.000 денари, а македонската економија е во слободен пад. Индустриското производство бележи пад во септември за 7,9 проценти, а прогнозите за економијата стануваат се полоши. По Светска банка и Народна банка ги намали проекциите за македонската економија и предвидува послаб раст оваа и наредната година - нагласи Тренчевска.

Потоа дополни дека „ова се лоши вести и потребно е заедничко делување за да им се помогне на граѓаните, а пакет решенијата на СДСМ, овие три политики кои ги споменав се реални, одржливи и ќе дадат брз резултат“.

- Жално е ако пратениците на ВМРО-ДПМНЕ се подготвени на штета на граѓаните да водат политички инает со отфрлање на добрите решенија - заклучи пратеничката на СДСМ.