Потрошени речиси два милиони евра за реклама на интернет

Добивај вести на Viber

Македонскиот пазар за онлајн огласување во 2013 година „тежел“ речиси два милиони евра, објави порталот Маркетинг365.мк. Според следењето на пазарот на интернет огласување за 2013 година, направено од Httpool во соработка со Ipsos Strategic Pulse, во минатата година се потрошени 1.940.017 евра, но во 2012 биле потрошени нешто повеќе пари - 1.945.715 евра. Оваа сума е добиена со следење на 40-тина македонски веб дестинации и забележување на сите рекламни објави што се појавиле на нив во текот на изминатата година. За сите реклами се собираат информации за огласувачот, брендот/производот/услугата кои се огласуваат, форматот на огласот и времетраењето на прикажувањето на огласите. При пресметката на цената на рекламата се земени последно достапните јавни ценовници на веб дестинациите, со што се добива бруто трошок за огласување. Притоа, телекомуникацискиот сектор предничи со 21,10% од средствата за реклами одвоени во 2013 година, зад него е услужниот сектор со 13,59% и транспортно-автомобилскиот со 13,17%. Огласувачите биле најактивни во месец декември (12,19%) и во мај (10,28%).