ПОЗИТИВНИ НАД 20, „МОДА“ ГИ ЗАТВОРИ ДВЕТЕ ФАБРИКИ - од понеделник се тестираат сите 730 вработени

Добивај вести на Viber

Двете фабрики на конфекцијата „Мода“ од Свети Николе, се затвораат денеска од 14 часот.

Оваа информација за Фактор ја потврди сопственикот на „Мода“ Ангел Димитров.

Раководството на компанијата оваа одлука ја донесе откако вчерашните тестирања на КОВИД-19, направени врз 210 вработени, покажале дека над 20 вработени се позитивни на коронавирусот.

Покрај овие 20, претходно беше утвредено дека уште 12 работници се заразени од КОВИД-19.

„Од тие причини донесовме одлука да ја затвориме целата компанија, односно двете фабрики на ‚Мода', кои работеа во по две смени. Двете фабрики, односно целата компанија сигурно нема да работат до четврток, идната недела“, вели за Фактор Димитров.

Тој нагласува дека од понеделник идната недела, компанијата на свој трошок ќе спроведе тестирање врз сите 730 вработени, односно и на двете смени од двете фабрики. 

Потоа во следните денови ќе се очекуваат резултатите, по што компанијата ќе донесе најверојатно одлука, сите оние работници што се негативни, да бидат повикани на работа и да го продолжат производниот процес.

„Ќе ги очекуваме резултатите, и потоа сите оние работници што се негативни, ќе бидат повикани на работа. Но, сосема е извесно дека двете фабрики ќе работат во по сао една смена“, објаснува Димитров за Фактор. 

Вчера сопственикот на „Мода“ за Фактор изјави дека на во компанијата за целиот период на работа се почитувале мерките на заштита, односно вработените биле на потребното растојание и носеле маски, но не може да се контролира однесувањето на работниците за време на паузите. 

Н.Н.Ф.