Пратениците молчат колку што молчи Димитровска: Ќе ја разрешат ли претседателката на ДКСК, осомничена за две кривични дела?

Добивај вести на Viber

Ќе ја разреши ли Собранието претседателката на Државната комисија за спречување на корупција, Татјана Димитровска – Ова прашање се отвори откако за неа,  обвинителството поднесе обвинителен акт за кривичните дела Оддавање службена тајна и Компјутерски фалсификат. Димитровска, уште откако беше откриено дека за неа се води истрага, се тргна од јавноста, но не даде оставка.

Единственото тело кое може да ја разреши е Собранието. Но, досега пратениците не покажаа никаква акција – молчат исто колку што молчи и претседателката на ДКСК. Тие можат да поведат постапка, па откако ќе биде разрешена, да изберат нов претседател на Комисијата, за таа да продолжи да работи во полн состав.

Без преземање на дејство, Собранието практично ја остава Димитровска да зема плата, а да не работи ништо. Судот претходно одобри мерки на претпазливост со кои и е забрането да работи на предмети, да прима пошта, односно и е забрането се што носи нејзината функција.

Таа е осомничена дека оддавала информации за тоа до каде е постапката „Адитив“ на поранешен директор на А.Д. ЕСМ – нејзин близок пријател кој е осомничен во премдетот. Но, при истражување на нејзиниот мобилен телефон, откриле и фалсификат за положен испит на Димитровска, уште кога била државен ревизор, па доби обвинение и за тоа.

При нејзиниот избор, Димитровска доби највисоки бодови – максималниот број на бодови и ги дадоа и СДСМ и ВМРО-ДПМНЕ.