ПРЕКВАЛИФИКАЦИЈА ИТНО: Стана ли недостигот од кадар, поголем проблем од долговите
Објавено во: Економија 17 Септември, 2018
Ако порано најголем проблем на компаниите бил натрупаниот долг од јавните институции, сега тоа е недостатокот на кадар, вели претседателот на Стопанската комора, Бранко Азески. И тој, но и другите бизнисмени се согласуваат дека мора да се најде начин проблемот со продуцирање несоодветни кадри да се смени. Владата најави мерка наречена „Шанса за сите“ со која дел од вработените кои не можат да се вработат ќе се преквалификуваат.
Вицепремиерот Кочо Анѓушев објасни дека на невработените лица ќе им биде понудена шестмесечна преквалификација која ќе биде поддржана од државата. Вели дека моментно има општина во која на пример има 12 невработени дипломирани професори по географија или историја, а постои само едно училиште каде е потребен само еден наставник.
Предлогот е ниво на општини да се направат анализи за образованието на невработените, а компаниите да номинираат работни места.
Министерката за труд и социјална политика Мила Царовска вели дека преку дијалог со бизнис заедницата ќе се креираат соодветни мерки со кои ќе се избалансира понудата и побарувачката на пазарот на трудот.
Азеаски вели дека проблемот со невработеноста и недостатокот на кадар, мора да се решава со комбинирани мерки. Предложи концептот на оваа мерка да биде на краток и на долг рок.