Продолжен рокот за пријавување за снимање на филмот за Тоше Проески

Добивај вести на Viber

Продолжен е рокот за аплицирање за снимањето на филмот, документарниот филм и серијалот за починатата музичка ѕвезда Тоше Проески.

На денот на одбележувањето на 44-годишнината од неговото раѓање, Канал 5 во вестите објави дека е продолжен конкурсот за продуцентските куќи и ќе трае до 24 февруари.

Министерот за култура и туризам, Зоран Љутков, претходно информираше дека во 2025 година ќе биде објавен конкурсот од Македонската радио-телевизија во врска со снимањето на филмот за Проески, а проектот треба да се реализира во рок од две години.

- Во проектот ќе бидат вклучени многу повеќе копродуценти, се надевам дека ќе бидат копродуценти скоро сите национални телевизии од Балканот, бидејќи навистина има многу голема заинтересираност, рече Љутков.

Во однос на тоа кога ќе почне снимањето, министерот рече дека зависи од тоа како ќе тече конкурсот.

Македонската јавност ја дочека со одобрување веста дека ќе се започне со снимање на игран филм, документарец и ТВ серија за балканската поп ѕвезда.

Носител на проектот е МРТ, а ќе се одвојат 1,5 милиони евра за снимањето на филмот, обезбедени од буџетот на Македонија преку Министерството за дигитална трансформација.