Пропадна тендерот за економската зона во Тетово

Добивај вести на Viber

Пропадна тендерот за економската зона во Тетово. Веднаш откако се утврдило дека не може да се донесе одлука која ќе биде принципиелна и која од двете фирми да го добие тендерот, се донела одука за забрзано спроведување на нов тендер, дознава АлсатМ. Според плановите презентирани од Министерството за економија, Владата решила во наредните 30 дена да се спроведе целосно нова тендерска постапка, по што најдоцна до 10 јануари 2013 година ќе се соопшти фирмата која ќе победи, по што веднаш ќе мора да стартува со работа на терен. Според информациите на Алсат М, тендерот бил поништен откако комисијата утврдила дека иако се е законски и може сепак да се донесе одлука, сепак има мали недоследности во потребната документација на двете компании, турската ТБС и норвешката СНС. За да нема ниту најмал сомнеж на целата постапка, се донела одлуката за нов тендер. Инаку, токму реализирањето на овој тендер е главен економски приоритет на министрите на ДУИ во Владата. Се проценува дека зачувување на министерското место во економија на Валон Срачини, под чии ингеренции е спроведување на тендерот, е врзано токму со успешното спроведување на овој тендер. Изградбата на тетовската економска зона од страна на компанијата победник, освен политички поени за ДУИ, која ќе се претстави како партија која покрај политичките спроведува и економски програми, ќе значи и многу за развој на регионот и за дополнително економско заживување на Полог. Затоа, според информациите од Владата, од партијата на Али Ахмети се обидуваат да изберат победник кој со сигурност ќе ја стартува зоната и со неа ќе управува во интерес на тамошното локално население, бидејќи за разлика од праксата со многубројните останати економски зони во земјава, тетовската нема да биде во државна сопственост и управување туку тоа ќе се прави преку формата на приватно – јавно партнерство, каде што компанијата ќе се грижи што е можно повеќе да донесе компании кои ќе работата во зоната. Досегашните две заинтересирани компании кои влегоа во завршната фаза на оценувањето, се реномирани фирми кои во своите матични земји работата со економски зони и паркови. Зоните на турската компанија годишно извезуваат од 6 до 7 милијарди евра, додека пак предноста на норвешката фирма е што зад неа стои владата во Осло која само за поддршка на вакви зони има фонд од три милијарди евра. Исто така норвешката фирма ја има и предноста дека доаѓа од високо развиена европска земја и соработува со фирми кои се на високо технолошко ниво. Горан Теменугов, АлсатМ