Просечната плата не ја полни потрошувачката кошничка!

Добивај вести на Viber

Според податоците на Државниот завод за статистика просечната месечна исплатена нето плата по вработен во мај оваа година изнесува 21.288 денари, додека бруто платата изнесува 31.247 денари.

Индексот на просечната месечна исплатена нето-плата по вработен, во мај оваа година, во однос на истиот период лани бележи зголемување од два отсто.

Ваквото зголемување се должи, пред сé, на зголемувањето на просечната месечна исплатена нето-плата по вработен во секторите: Рударство и вадење на камен за 8,1 отсто, Транспорт и складирање за 6,9 отсто и Снабдување со електрична енергија, гас, пареа и климатизација за 6,4 отсто.

Зголемување на просечната месечна исплатена нето-плата по вработен, во однос на претходниот месец, е забележано во секторите: Рударство и вадење на камен за 7,4 отсто, Снабдување со електрична енергија, гас, пареа и климатизација за 7,1 отсто и Објекти за сместување и сервисни дејности со храна за 6,9 отсто.

Во мај оваа година, 1,5 отсто од вработените во Македонија не примиле плата.

Но, за да се истурка јуни биле потребни 32 571 денар. Според најновите мерења, минималната синдикална кошница станува се поскапа.

За исхрана и пијалаци на едно семејство му биле потребни 13 921 денар, за домување 10 375 денари а за превоз 2 339 денари.

За една година, односно во споредба со јуни 2012 та година, за исти производи и услуги на едно семејство сега му требаат 1 300 денари повеќе.

Најголем пораст е регистриран кај трошоците за храна, кои зафаќаат дури 43% од минималната синдикална кошница. Пораст е регистриран и кај трошоците за облека и за хигиена.

Во исто време, во јуни, статистиката измери раст на трошоците за живот од 4,2% во однос на истиот месец лани, пришто најголем пораст од 6,9% е рагистриран кај облека и обувки, 6,2% кај исхраната и 4,9% кај огрев и осветлување.