Први резултати од екстерно – полуматурантите го кренаа просекот

Добивај вести на Viber

Резултатите од екстерното тестирање на сите осмоодделенци ќе бидат истакнати денеска по 12 часот во сите основни училишта, а за останатите ученици во следните неколку денови. Просечната оценка на постигнувањето на осмоодделенците е 3,67. Во однос на минатата година, кога просекот изнесуваше 3,53, оваа година резултатите се повисоки за 0,14 процентни поени. - Секој ученик ќе може да ги погледне оценките кои ги добил по предметите по кои бил тестиран и најдоцна во рок од три работни денови, практично од понеделник до среда доколку смета дека е потребно, ќе има можност да поднесе приговор до училишната комисија која ќе го проследи до Државниот испитен центар во чија надлежност е носењето на конечната одлука, посочи Спиро Ристовски, министерот за образование во заминување. Најдобри резултати со просек од 4,95 постигнале полуматурантите од ОУ „Гоце Делчев“ во Скопје, општина Центар, додека најслаби резултати постигнале полуматурантите од ОУ „Страшо Пинџур“ во општина Карбинци со просек од 2,52. Уписите во сите средни училишта почнуваат на 23 и 24 јуни со исклучок на паралелките во Спортската академија каде првиот уписен рок е на 19 и 20 јуни. - Учениците кои од оправдани причини не полагале еден од предметите или пак, воопшто не биле тестирани, тоа ќе можат да го направат во августовската испитна сесија за што дополнително ќе бидат информирани за термините и предметите по кои се проверуваат нивните постигнувања. Потоа, по подигнувањето сведителства ќе можат да конкурираат за упис во средно училиште на 21 август, односно во вториот уписен рок, истакна Ристовски. Министерот очекувал поголемо зголемување на просечната оценка на постигнувањето на осмоодделенците.