Прво документ, потоа производство и продажба на ПВЦ врати и прозорци

Добивај вести на Viber

Без изјава за сообразност на градежните производи, која ќе ја издаде македонска акредитирана лабораторија, производителите и трговците со ПВЦ врати и прозорци нема да можат да работат. Како што денеска соопштија од од Министерството за економија, тие во наредните 30 дена треба да се пријават и да побараат испитување на нивните производи до акредитираните лаборатории. Притоа сите производители и трговци или увозници на ПВЦ врати и прозори потребно е да имаат изјава за сообразност, односно да бидат испитани од акредитирани лаборатории во врска со нивната намена за да бидат пуштени на пазарот. Како што соопштија од Министерството за економија, по истекувањето на определениот рок, Државниот пазарен инспекторат ќе продолжи со контролата на градежните производи кон производителите и трговците на градежни производи. Притоа, сите производители на градежни производи и трговци на градежни производи, кои во дадениот рок ќе започнат постапка за  испитување на градежните производи до акредитираните лаборатории во Република Македонија, ќе можат да продолжат со своите редовни активности. „Предложените измени се во согласност со Законот за градежните производи, Правилникот за начинот за атестирање, постапките за атестирање, означување на градежните производи и содржината на документите за сообразност, како и со Законот за надзор на пазарот и списоците на објавени МКС ЕН стандарди“, посочуваат од Министерството.