ПСИХОЛОГ ОД БЕРОВО: Стресот од пожарите остави длабока трага која може да оживее во иднина

Добивај вести на Viber

Јаворка Постоловска, психолог од Берово која и самата деновиве била во непосредна близина каде гореа пожари, бидејќи потекнува од село на кое му се закануваше опасност од огнот, вели дека последиците по психолошкото здравје допрва ќе ги почувствуваме од она што се случи.

Објаснува дека имало измешани чувства, од страв, паника, до љубопитност, затоа што се случи несекојдневен настан со апокалиптични сцени. Додава дека на лице место имаше полиција, војска, пожарникари, многу народ кој учествуваше во гаснење на пожарите, и тоа од една страна прави паника, но од друга страна дава и чувство на сигурност.

„Имаше деца кои прашуваа „Сите ли ќе умреме“, имаше и стари луѓе кои велеа „Не одиме никаде, ќе си ги браниме домовите“. Но, и на нас кои сме во средни години не ни беше сеедно. Тој стрес ќе си остане во сеќавањата, затоа што остави длабока трага и може да оживее во слични ситуации во иднина. Пожарите се топ тема, и луѓето ги сумираат впечатоците за она што се случи“, вели Постоловска.

Објаснува дека луѓето стручна помош засега не бараат, но оние кои ја познаваат неформално разговарале со неа. Таа вели дека е важно луѓето да не ги кријат емоциите и да не молчат.

„Подобро е да се искажат отколку да молчат и да им биде тешко. Луѓето сега ги сумираат импресиите. Уште ги гледаат оние страшни видеа од пожарите, ги читаат вестите. Секој човек има различен степен на емоционална зрелост и различно ќе ги доживее пожарите. На тоа треба да гледаме како на една колективна несреќа,  и да извлечеме поука за да не се случуваат такви настани во иднина. Децата се љубопитни, и за секој збор кој го слушнале како „итно“, „апокалипса“, „алармантно“, ќе прашуваат дома, ќе истражуваат, и важно е како во кругот на семејството се разговара за овие теми“, објасни Постоловска.

Источниот дел на Македонија се соочи со пожари какви немало досега. Штетите се огромни, затоа што има уништени шуми, куќи, викендици. Мештаните поминаа неколку ноќ без сон надгледувајќи како огнот се заканува да го уништи она што цел живот го стекнувале.