Путин го прекина договорот со САД за преработка на плутониум

Добивај вести на Viber

Рускиот претседател Владимир Путин денеска потпиша закон со кој се става крај на де факто веќе застарениот договор меѓу Русија и САД за преработка на плутониум, чија цел беше спречување на двете страни да произведуваат уште повеќе нуклеарно оружје.

Договорот за управување и преработка на плутониум, потпишан во 2000 година и дополнет во 2010 година, ги обврзуваше Русија и САД да ги преработуваат своите големи залихи на плутониум создаден за време на Студената војна во гориво што може да се користи за нуклеарна енергија за производство на струја. Секоја страна се обврза да рециклира 34 тони плутониум.

Американските власти проценија дека со тој договор се елиминира материјалот потребен за производство на еквивалент на 17.000 парчиња нуклеарно оружје.

Путин во 2016 година со декрет нареди суспензија на учеството на Русија во тој договор во контекст на влошување на односите меѓу двете сили за време на претседателскиот мандат на Барак Обама.

Законот што Путин го потпиша денеска, а кој руските пратеници веќе го одобрија во октомври, претставува официјално откажување од тој договор.

Западните власти ја обвинуваат Москва дека користи нуклеарни закани од почетокот на инвазијата на Украина во февруари 2022 година.

Неколку дена по почетокот на офанзивата, Путин ги стави руските нуклеарни сили во состојба на максимална подготвеност. Во 2024 година, тој потпиша указ со кој се намали прагот за употреба на нуклеарно оружје.

Путин вчера соопшти дека Русија успешно го извршила конечното пробно лансирање на својата нова крстосувачка ракета на нуклеарен погон „Буревестник“.

Мировните преговори меѓу Москва и Киев се во ќорсокак и покрај посредувањето на американскиот претседател Доналд Трамп, кој вети дека брзо ќе го прекине конфликтот по враќањето во Белата куќа во јануари. Трамп во вторникот на неодредено време го одложи планот за состанок со Путин во Будимпешта изјавувајќи дека не сака да води разговори „залудно“.