Работам како личен асистент на сестрата на емирот на Катар-ги организирам нејзините патувања, забави и приеми: Павлинка Тренева Муса за животот во Доха

Добивај вести на Viber

Шансата да замине за Катар се појавила случајно, кога имала 22 години и ја прифатила без размислување. Новите познанства истекнатите искуства ѝ дале полет и желба за напредување. Во почетокот работела како фризерка , а потоа и како шминкерка. По десет години престој во Доха, Катар, штипјанката Павлинка Тренева Муса може да се пофали со исклучително успешна кариера, но и со исполнет приватен живот. Работи како личен асистент на Да Фатема бин Хамад Алтхани, сестра на емирот од Катар, Тамим бин Хамад бин Калифа Алтхани, еден од најбогатите во светот.Зборува англиски, арапски и шпански јазик. Мажена е за архитектот Елиас Муса (32), по потекло од Либан. Родители се на Јара, која неодамна го прослави првиот роденден.

Според кодексот на работа, не смее да објавува фотографии со катарската принцеза. 

* Шансата за подобар живот, желбата за докажување и напредување во кариерата, младите претежно ја гледаат во европските земји или во Америка. Кој беше мотивот ваша дестинација да биде Катар?

- Катар не ми беше планиран, сам ми се случи. Отсекогаш знаев дека сакам да пробам можеби и некоја кратка сезонска работа надвор од Македонија, барем заради искуство. Па така кога случајно ми излезе шансата за Катар без размислување заминав. Не бев во некоја ексесивна потрага за работа во странство па на почетокот заминувањето повеќе го сметав за авантура.

* Искуствата се различни, какво беше вашето? Се навикнавте ли брзо на тамошниот живот?

- Моето искуство е прекрасно, немав воопшто проблем со прилагодување. Можеби фактот дека бев многу млада придонесе во тоа да не ја сфатам тежината на промената која тогаш ја направив. Сите нови познанства, искуства, запознавање на нови култури, верувам дека на секој 22 годишен човек би му дале само полет и желба за напредување. Нормално имаше и тешки моменти и тоа најчесто поради  сопственото отсуство на битни моменти и случки во семејството и на пријателите.

Арапската традиционална шминка е поразлична од нашата.

* Кој ви беше првиот работен ангажман?

- Прво започнав да работам како фризерка. Со текот на времето се едуцирав и почнав со шминкање.

* Арапките важат за исклучително негувани жени. Каков вид на дневна и ноќна шминка претпочитаат? Ги следат ли светските трендови?

-Точно, но сепак не би можела да генерализирам. Арапската традиционална шминка е многу потешка и поразлична од нашата. Буквално можете преку ден да видете девојки нашминкани како за свадба. Но, во последните години посебно помладите практикуваат многу поприроден изглед.

* Дали работата како шминкерка ве спои со една од сестрите на Емирот од Катар? Што беше пресудно да ја стекнете нејзината доверба и да и станете личен соработник?

- Не би можела да дефинирам со што точно ја стекнав нејзината доверба. Таа беше мој долгогодишен клиент додека работев како шминкерка. Тие се свесни за својот статус и позиција која ја имаат тука во општеството. Но, свесни се и за лажно додворливите луѓе помеѓу нив кои понекогаш се дури нападни во желбата за дружба со нив. Јас имав сосема спротивен пристап од горенаведеното, па можеби тоа беше пресудно.

Ниту едно секојдневие на принцезата не е исто

* Која е вашата функција, за што сте задолжени ?

- Оффф, тешко прашање. Буквално сум инволвирана во сѐ. Од правење персонален онлајн шопинг до замисла, планирање и реализација на патувања, забави, приеми. Од придружба на пријателски ручек до наоѓање на фирми за изградба на куќи и следење на цела реализација до завршеток на истата.

* Како изгледа едно секојдневние на една принцеза? 

- Ниту едно секојдневие не е исто. Еден ден може да биде поминат во кревет пред тв, наредниот да се почне со патување до некоја соседна држава. Доколку има голема забава или свадба во склоп на семејството целиот ден па и недела и се планира според потребите на истата.

* За оваа богата, истовремено егзотична и мистична земја постојат повеќе предрасуди. Кои од нив ќе ги потенцирате?

- Најголема заблуда е дека овде жените се заробенички на мажите, живеат затворени во златни кафези и се машини за раѓање деца. Поради мојата работа сум опкружена со многу катарски жени кои се највисоко едуцирани по Европски универзитети, кои се бизнис жени, кои попладневното кафе можат да го пренасочат и за пет минути да стане шопинг во Турција или сафари во пустината без да бараат дозвола од мажите. Исто така владеат предрасуди дека не се почитуваат други религии освен Исламот или дека се врши притисок за ковертирање што е тотална небулоза. Постојат дискотеки, барови, кафулиња и секој може да си го пронајде стилот на живот кој му одговара.

Сопругот ја обожава Македонија

* Таму го запознавте и вашиот сопруг кој е од Бејрут , уште еден доказ дека „ љубовта не познава граници“. Како го доживевте Либан, а како тој ја доживеа Македонија? 

- Либан е медитеранска преубава земја која изобилува со природна убавина. Либанците сакаат да се наречат сами себе “Европејци помеѓу Арапите” што многу кажува за нив. Го сакаат животот и го живеат со полни гради и покрај сите лоши и деструктивни политики кои ги следат години наназад. Тој ја обожава Македонија, пријатно беше изненаден од гостопримливоста од тоа како сите меѓу себе се знаеме. Од тоа како одењето на кафе во попладневните часови е непишано правило и традиција.

* Наидов на податок дека во Доха постојат православни цркви и литургии, а секој петок луѓето се собираат таму на служби. Присуствувавте ли на овие служби за божикните празници? 

- Да постојат, конкретно македонска православна црква нема, но има грчка и таа е најпосетувана од Македонците тука. Лично не ги посетувам, иако сум верник. Сепак опкружена сум со многу Македонци пријатели со кои се гледаме многу често без повод, тоа да е петочна литургија.Можеби не звучи убаво и е малку непатриотски, но мене Катар ми е безбедна зона, место каде што точно знам во секоја фиока што имам, родно место на мојата ќерка, земја која без проблем од неодамна и пружи работа, сигурност а со тоа и дом и на мојата сестра. На мајка ми шанса да си го гледа првороденото внуче.

Соња Алексоска Неделковска