Работниците во индустриските зони на готовс по добрите вести од Германија

Добивај вести на Viber

Работниците од фабриките во слободните економски зони низ Македонија за автомобилски делови добиле известување да бидат подготвени и во секој момент дека ќе треба да се вратат на работните места, по вестите дека наскоро делумно  ќе се рестартира производството на автомобили во Германија и во останатиот дел од Европа..

Одреден дел од работниците на „Кромберг и Шуберт“ би можеле да се најдат на своите работни места уште денеска. Во „Дракслмаер“ биле испраќани СМС-пораки до вработените да бидат подготвени овие денови, а исто така и во „Џонсон Мети“, дознава „Фактор“.

Во Македонија официјално „Кромберг и Шуберт“ и „Дракслмаер“ објавија дека нема да испорачуваат делови овој период, а исто така и „Џонсон Мети“ поголем дел од работниците испрати на принуден одмор.

Производителот на Мерцедес-Бенз Дајмлер вчера соопшти дека планира да ја започне работата во фабриките во Германија од 20 април по неколкунеделен прекин.  БМВ објави во вторникот дека ќе продолжи со производствената линија од 30 април, додека европските фабрики на „Форд“ се во мирување најрано до 4 мај. Фолксваген во Волфсбург започнува повторно на 20 април. До тогаш на европско тло започнуваат со работа и Тојота, Рено, Хјундаи и Фијат Крајслер.

Продажбата на автомобили опадна во неколку европски земји во март како резултат на ограничувањата предизвикани од корона вирусот. Засега значителен раст на побарувачката на автомобили има само во Кина и Јужна Кореја.

Во „Кромберг и Шуберт“, „Дракслмаер“ и „Џонсон Мети“ во моментов има околу 11.000 вработени, а овие странски инвестиции на големо го билдаат македонскиот извоз секоја година.

А.К.