Раскинат договорот со фирмата која доставува храна за армијата
Објавено во: Македонија 09 Октомври, 2024
Министерот за одбрана Владо Мисајловски објави дека е раскинат договорот со надворешната компанија што ја снабдуваше Армијата со храна, по случајот со труењето на повеќе од 60 припадници.
Труењето се случи минатиот месец во Центарот за обука на питомци на Воената академија „Генерал Михаило Апостолски“, со поплаки на мачнина проследена со повраќање. „Далма фоод и кетеринг“ тогаш соопшти дека не е пронајдена вина во нивните редови.
-Еднострано е раскинат договорот кој имаше многу недостатоци. За да не биде политичка одлуката како министер за одбрана направив Комисија заедно со Министерството за одбрана, Генерал-штабот и Армијата која ги прегледа сите записници и констатираше премногу пропусти и заедно со Армијата ни даде препорака да биде раскинат договорот. Договорот е раскинат и течат сите законски прописи, но мене најважно од се ми е да не се наруши борбената готовност и секој припадник на Армијата да биде безбеден, рече министерот како одговор на новинарско прашање на настанот по повод 100 дена работа.
Мисајловски додаде дека се консултирал со правниот сектор во Армијата и со адвокат за раскинувањето на договорот, но и дека надлежните од здравство нашле некои бактерии на работните површини што компанијата која вршеше кетеринг не ги отстранила при првата опомена, затоа, како што кажа, овој договор мораше да биде раскинат. Од Министерството за одбрана претходно соопштија дека комисијата во состав на одговорни лица од сите сектори и секции од Министерството и Генералштабот на Армијата одлучиле да го раскинат договорот со кетеринг компанијата доколку се утврдат недостатоци и неправилности.
-Согласно Колективниот договор на секој припадник во Армијата и Министерството му следи надомест за хранарина. Бидејќи договорот е раскинат на секој припадник ќе му биде исплатен надомест за хранарина. Во делот на Армијата каде мора да има оброци тоа веќе го регулиравме и ќе се готви во Армијата како што беше и пред неколку месеци, посочи Мисајловски.
Во иднина, како што кажа, може да се спроведат две постапки – целосно да се исплаќа хранарина по основ на Колективен договор или да се распише нова постапка за нова кетеринг компанија за што веќе се обезбедени средствата во буџетот.
-Ќе го избереме она што најголем дел од Армијата и вработените ќе го побараат, потенцира Мисајловски.