СИНОТ НА ПРЕМИЕРОТ ПАТУВАЛ НА СВОЈ ТРОШОК ВО САД: Антикорупциската комисија ја затвори истрагата
Објавено во: Македонија 09 Октомври, 2024
Државната комисија за спречување на корупција (ДКСК) денеска
донесе одлука да ја затвори постапката во врска со патувањето на синот на
премиерот Христијан Мицкоски во САД, откако утврди дека нема докази за
злоупотреба на државни средства. Комисијата ја покрена истрагата по своја
иницијатива на 16 јули, откако се појавија сомнежи дека младиот Мицкоски, кој
има 18 години, патувал на државен трошок како дел од македонската делегација на
НАТО Самитот во Вашингтон и последователната посета на Њујорк.
Официјалната делегација се состоела од 21 член, меѓу кои претставници од кабинетот на премиерот, Министерството за надворешни работи, Министерството за внатрешни работи, Министерството за одбрана и македонската амбасада во Вашингтон.
ДКСК утврди дека тој не бил дел од официјалната делегација и не присуствувал на ниту еден официјален состанок. По деталната проверка на документите, Комисијата заклучи дека нема докази за прекршување на Законот за спречување на корупција и судир на интереси, ниту за злоупотреба на буџетски средства. Со тоа, постапката е затворена и архивирана.