Родители своите првачиња ги учат како да седат дома сами: Некои не смеат да ја користат владината мерка-ослободени од работа
Објавено во: Македонија 04 Септември, 2020
Со
почетокот на новата учебна година, повторно истиот проблем кој да ги згрижи децата
кои ќе бидат на настава во претпладневите часови, најмногу од 8.00 до 11.00 и
секако кој ќе биде со оние кои ќе останат дома, наставата да ја следат онлајн.
Родителите веќе прашуваат дали и понатаму важи владината мерка која беше
воведена во почетокот на епидемијата, веднаш по затворањето на училиштата и
градинките. Но истите прашања ги поставуваат и некои сопственици на помали
фирми, кои велат дека ова повеќе нема никаква смисла и дека колку и да ги
толерираат своите вработени, сиве овие месеци, работата повеќе не смее да трпи.
Истовремено, пак, и мајките и татковците кои не се во државната администрација се револтирани дека Владата овозможи на огромен број вработени во институциите да седат дома и да земаат плата.
-Што да ви кажам, јас мора да одам на работа, во спротивно ќе добијам отказ. Немам шанси работните задачи да ги извршувам од дома. Истото е и со сопругот. И досега се снаоѓавме. Ја гледавме ќерката за викенд. Практично од март до сега беше кај моите родители во Битола, а што ќе правиме сега, не знаеме. Веќе е прваче, ја пријавивме за физичко присуство, па ќе молам соседи, роднини тука што се да ја земаат и да ја носат до дома. Уште сега и кажувам дека ќе мора сама да се грижи за себе додека не се вратиме од работа. И укажувам на сите опасности во станот, да не отвора врата никому. Тоа е, што да се прави, вели Маја Д. Од Скопје.
Проблемот станува уште поголем со тоа што, дел од воспитувачките и учителките вработени во градинките се исто така мајки на деца до 10 години, па сега установите за згрижување деца се соочуваат со недостиг од кадар. Токму затоа, министерката за труд и социјална политика вчера на прес-конференција истакна дека е веќе побарано од општините да вработат соодветен стручен кадар во градинките за да може работата во установите да се одвива непречено.
Истовремено, од ресорното министерство стигна и појаснување за мерката за ослободување на родители на малолетно дете до 10 години, кои се вработени лица во време на Ковид-19.
-На почеток на корона кризата или поточно 10 март Владата на предлог на Комисијата за заразни болести при МЗ донесе заклучок со кој, вработените лица кои имаат малолетно дете со навршена возраст до 10 години или активно четврто одделение ,за кого е неопходна домашна грижа, еден родител да биде ослободен од работа и работни активности и неговото отсуство за време на овој период да биде евидентирано од страна на работодавачот како оправдано отсуство. На 8.7.2020 на 74 седница Владата донесе одлука за изменување и дополнување на одлуката за мерките за спречување на ширење на Ковид -19, односно родителите на деца до 10 години возраст, вклучени во воспитно образовниот процес, кои беа ослободени од работа, да се вратат на работните места, со оглед дека учебната година е веќе завршена, што значи дека мерката за ослободување на родители од работа сеуште важи за еден од родителите на деца кои биле згрижени во градинка. Ова е во важност до донесувањето на следната владина одлука по препорака на Комисијата за заразни болести при Министерството за здравство, се вели во соопштението на Министерството за труд и социјална политика.
За ова прашање, и министерот за здравство, Венко Филипче најави дека во текот на следнава недела прво ќе се разговара во Комисијата за заразни болести според проценката на ризик во сегашната ситуација на епидемијата, по што ќе се донесе одлуката.
Анита Буховски