РОКОТ ЗА ВЛАДА ГИ БРОИ ПОСЛЕДНИТЕ ЧАСОВИ: Уште не се знае што ќе се случи!

Добивај вести на Viber

Мандатарот за состав на новата Влада, екс премиерот и лидер на ВМРО-ДПМНЕ Никола Груевски треба до полноќ да соопшти дали обезбедил парламентарно мнозинство за формирање на владин кабинет.

Во моментов сите очи се вперени во седиштето на ДУИ откаде се очекува одлуката на ДУИ од која ќе се знае дали Груевски ќе може да формира Влада или сепак тоа ќе пропадне во вода.

Засега сеуште сите опции се отворени-од тоа новата влада да ја формираат старите партнер ВМРО-ДПМНЕ и ДУИ, па се до можни нови избори, кои би биле одржани заедно со локалните во април оваа година.

Сите разговори на евентуалните коалициони партнери се одвиваат далеку од очите на јавноста зад затворени врати.

И додека дел од ДУИ е за почитување на мајскиот договор да се влезе во коалиција со победникот на парламентарните избори, дел од таа албанска партија не сака коалиција со ВМРО-ДПМНЕ и Груевски.

Доколку, меѓутоа Груевски до утре не ги соопшти резултатите од разговорите за евентуална коалиција, мандатот за состав на нова влада, би требало, според Уставот да го добие втората партија по големина, или опозициската СДСМ.

ВМРО на изборите освои 51 пратенички мандат, а СДСМ 49.

ДУИ и понатаму е највлијателна албанска партија, но на декемвриските избори освои значајно помалку мандати во однос на претходните избори-само 10.

Било како било, Европската унија очекува брзо формирање на влада, а според толкувањата на еврокомесарот Јоханес Хан најдобро би било формирање на „широка коалиција“.