Руското МНР за Македонија: Има продлабочување на кризата и силно надворешно влијание

Добивај вести на Viber

Русија констатира сериозно продлабочување на политичката криза во Македонија и силно надворешно влијание, стои во денешната реакција на Министерството за надворешни работи на Руската Федерација во врска со ситуацијата во земјата, пренесе руската агенција ТАСС.

Додаваат дека станува очигледно дека вештачки предизвиканите вонредни парламентарни избори што се одржаа на 11 декември 2016 година не придонесоа за решавање на ситуацијата.

Сметаат дека под псевдодемократски слогани продолжува длабокото надворешно влијание врз политичките сили во Македонија. 

„Бесрамното макијавелистичко манипулирање со волјата на гласачите може да предизвика ескалација на состојбата во Македонија и да ја наруши кревката стабилност во целиот регион“ - наведува Министерството.

Целта, потенцираат,  е очигледна, западот да расчисти со македонските политичари кои не му се омилени и покрај јасно изразената волја на граѓаните на изборите во полза на коалицијата „За подобра Македонија“ на чело со Никола Груевски и ДУИ на Али Ахмети.

Од руското МНР истакнуваат дека „особен немир предизвикува фактот што во мултиетничка и мултикултурна Македонија каде имаше тежок меѓунационален конфликт политичарите од една етничка заедница врз основа на надворешно диктирани ултимативни барања фактички решаваат кој од блоковите на другата заедница да влезе во составот на идната владина колаиција“.

Сметаат дека само со целосно отфлање на штетните надворешни влијанија и со фокусирање на вистинската демократија, и самостојно решавање на внатрешните проблеми се основа за зацврстување на довербата меѓу народите кои живеат тука и формирање регионална клима за безбедност.

Во земјава уште е неизвесно кој ќе формира влада. Вчера шефот на државата, Ѓорѓе Иванов одржа консултации со политичките партии, по што беше соопштено дека оној кој ќе обезбеди мнозинство и тоа ќе го докаже ќе го добие мандатот.