Руте: Зошто воопшто нè интересира што мисли Русија за трупите во Украина?

Добивај вести на Viber

Генералниот секретар на НАТО, Марк Руте изјави дека Русија нема право да одлучува дали западни трупи може да бидат распоредени во Украина, бидејќи тоа е суверена држава и решението е исклучиво нејзино. 

„Зошто воопшто нè интересира што мисли Русија за трупите во Украина? Тоа е суверена нација. Не е на нив да одлучуваат“, рече Руте на безбедносниот самит на IISS во Прага, додавајќи дека „треба да престанеме да го правиме Путин премногу моќен“.

Руте нагласи дека во сценарио на прекин на огнот и мировен договор, доколку Киев побара сили за безбедносни гаранции на своја територија, тоа е легитимна одлука на Украина. Паралелно, европските сојузници разгледуваат модел на „коалиција на подготвените“ за поствоени гаранции, со можен европски копнен контингент и воздушна поддршка, во координација со САД — процес што и денес е тема на состаноци на европските лидери.

Руте предупреди дека заканата „нема да исчезне кога ќе заврши војната“, укажувајќи на растечката координација меѓу Кина, Иран и Северна Кореја и потребата НАТО да се подготви за подолготрајна конфронтација. 

Украинскиот претседател Володимир Зеленски денеска изјави дека територијални отстапки на Украина само ќе доведат до тоа рускиот претседател Владимир Путин да ги искористи освоените територии како отскочна даска за нови офанзиви.

Руската инвазија на Украина почна на 24 февруари во 2022 година. Русија бара признавање на окупираните територии како руски. Русија не сака трупи на НАТО во Украина.