Сакаа да забранат возење автомобили на бензин и дизел, но се откажаа: „Може да ги купите, но има рок“

Добивај вести на Viber

Велика Британија ќе ја одложи забраната за нови автомобили и комбиња на бензин и дизел од 2030 до 2035 година, изјави премиерот Риши Сунак во сенка на приказната за давање приоритет на производството на електрични автомобили.

Британскиот премиер појасни дека ги забавуваат плановите за борба против климатските промени, најавувајќи одложување на забраната за продажба на нови бензински автомобили за да ја задржи јавната поддршка за транзицијата кон нула емисии.

Тој рече дека овие автомобили и потоа ќе бидат достапни за купување на пазарот на половни возила.

- Ќе ја олесниме транзицијата кон електрични возила. Сè уште ќе можете да купувате бензински и дизел автомобили и комбиња до 2035 година. И после тоа, сепак ќе можете да ги купувате и продавате како користени - рече Сунак.

Тој изјави дека неговата влада останува посветена на постигнување на законски обврзувачката цел за производство на нето нула емисии до 2050 година.

Сунак објави дека целите поврзани со топлинските пумпи и изолацијата, кои се потребни за поддршка на транзицијата во рамките на климатската политика, исто така се ублажени.

Тој рече дека нема да воведе нови даноци за да го обесхрабри летањето, ниту да забрани ново екстракција на нафта и гас во Северното Море или да ги принуди домаќинствата да преземат мерки за енергетска ефикасност.

За да ги ублажи, како што ги нарече, „неприфатливите трошоци“ за енергетската транзиција за британските домаќинства, Сунак го одложи спроведувањето на забраната за продажба на автомобили на бензин и дизел од 2030 до 2035 година.

Тој најави олеснување на транзицијата од гасни котли и дека нема да ги тера домаќинствата да ја подобрат изолацијата.

Сунак рече дека ја менува мерката затоа што претходно властите пребрзо се движеле кон целта за нула емисии, без да ја добијат поддршката од јавноста.

„Доколку продолжиме по овој пат, ризикуваме да ја изгубиме поддршката од британскиот народ, а реакцијата што ќе резултира не само што ќе биде против конкретните политики, туку и против самата поширока мисија“, рече тој.

Компаниите и еколозите тврдат дека историската декарбонизација на британската економија е можност да се поттикнат инвестициите и економскиот раст и да се создадат добро платени работни места, вклучително и во поранешните индустриски градови.

За да успее ова, тврдат дека Владата мора да обезбеди стабилен и предвидлив амбиент за да ги поттикне компаниите и населението да се променат.

На Велика Британија и претстојат парламентарни избори следната година, па Сунак изгледа верува дека со омекнување на зелените политики ќе ги придобие гласачите кои се борат со висока инфлација и стагнација на економски раст.

Велика Британија беше првата голема економија која усвои законски обврзувачка цел за нула емисии до 2050 година.

Од 1990 година, тие се намалени за речиси 50 отсто поради затворањето на електрани на јаглен и изградбата на морските фарми со ветерници.

Фото: EPA-EFE/ANDY RAIN