СДСМ до родителите: Разговорите се кај СЈО а не кај нас

Добивај вести на Viber

Социјалдемократскиот сојуз им порача на родителите на убиените деца кај Смилковско езеро кои денеска присуствуваа на новото рочиште за случајот „Монструм“ одговорите да ги бараат во Специјалното јавно обвинителство, откако од партијата се побара одговорност во споделувањето на информациите.

СДСМ  одговори на обвинувањата на Горан Наќевски, татко на Александар, една од вкупно петте жртви кои беа сурово егзекутирани пред шест години кај Смиљковското езеро крај Скопје, кој на денешното рочиште за случајот „Монструм“ се обрати пред судот со барање судот да изврши претрес во просториите на владејачката партија за да се најдат транскриптите од телефонските разговори поврзани со ова злосторство за кои тврди дека постојат и им ги ветувал на семејствата актуелниот премиер Зоран Заев.

Наќевски побара од судот да изврши претрес во СДСМ затоа што премиерот Заев му покажал транскипт за разговор на еден од обвинетите во „Монструм“ со Невзат Бејта од ДУИ. На ова, од владејачката партија во изјава за Лидер велат дека транскриптите се во Специјалното јавно обвинителство (СЈО).

„На 30.12.2015 година претседателот на СДСМ, Зоран Заев, ги предаде на Специјалното јавно обвинителство. За случајот ‘Монструм’ надлежни се правосудните органи во Република Македонија. Очекуваме дека преку еден транспарентен процес ќе се затворат сите прашања“, се наведува во одговорот кој го цитира Лидер.

Инаку Наќевски побара од судот јавно да се објави чии се петте телефонски броеви кои се заведени како државна тајна, а комуницирале со сега обвинетите во случајот Монструм.

„На една од средбите, сегашниот премиер Зоран Заев ни кажа дека тие броеви се на пет функционери од ДУИ, а ни покажа и транскрипт од разговор воден меѓу потпретседателот на ДУИ, Невзат Бејта, со обвинетиот Фејзи Азири. Не ни ги даде транскриптите, бидејќи ни рече дека ќе сторел кривично дело, но затоа бараме од судот да изврши претрес во СДСМ и да ги одземе овие документи. Бараме и Заев, ако треба и стражарно да се донесе во судница, па тука да се соочи со сите родители за да видите дека ја зборуваме вистината. Исто така, Заев ни рече дека ‘опел омегата’, или возилото со кое се превезувале извршителите е на МВР. Заев не ни исполни многу ветувања, ни ветуваше дека ќе се дознае вистината, но тоа не се случи. Тој со доказите што ги поседува манипулира и уценува“, истакна Наќевски пред судот.