СДСМ побараа враќање на дневната тарифа и поевтина струја, ВМРО вратија:Вие го продадовте ЕСМ

Добивај вести на Viber

Од најголемата опозициска партија СДСМ побараа враќање на дневната евтина тарифа и намалување на цената струјата, од владеачката ВМРО пак вратија, продажбата на ЕСМ ги донесе ваквите сметки. СДСМ побара од Регулаторната комисија враќање на дневната евтина тарифа за електрична енергија, а Владата да им наложи на ЕЛЕМ и МЕПСО да запрат со сите непродуктивни трошоци и да спроведат политика на заштеди во своите компании со што ќе се обезбеди основа за намалување на цената на струјата. Како што денеска изјави денеска Миле Андонов, од СДСМ, граѓаните немаат пари да ги плаќаат новите високи сметки,  цената на електричната енергија е повеќе од дуплирана во изминативе шест години, a цената на огревното дрво и со последните намалувања е за преку 60% повисока од пред шест години. „Укинувањето на дневната евтина тарифа ќе предизвика дополнително зголемување на трошоците за електрична енергија. Уште тогаш се спротивставивме и предупредувавме дека одлуките на Регулаторната ќе предизвикаат преголем товар за граѓаните соочени со сиромаштија, а поради основаните сомнежи за незаконитост, Хелсиншкиот комитет нив ги оспори и пред Уставниот суд“, рече Андонов. Тој обвини и дека сите овие поскапувања се резултат на недостатокот на инвестиции во енергетиката, зависноста на Репунлика Македонија од скапиот увоз, но исто така и на милионските непродуктивни трошоци на државните ЕЛЕМ и МЕПСО, во беспредметни рекламни кампањи, фасади за нивните административни згради, како и целосно нејасни инвестиции во ски терени и туристички капацитети. ВМРО реагираше - СДСМ ја продаде ЕСМ „Темата за поскапување на струјата е апсолвирана. Граѓаните денес плаќаат поскапа струја како резултат на бонбона бизнисот на Шекеринска, кој беше направен во време кога СДСМ беше на власт. Со тој бизнис се изврши продажба на државниот монопол и пренесување на монополските овластувањата во рацете на приватна компанија“, стои во реакцијата на ВМРО-ДПМНЕ. Исто така, се истакнува во соопштението уште во 2006-та година кога владата СДСМ го продаваше ЕСМ, експертот на СДСМ Атанаско Тунески призна дека ако се продаде ЕСМ ќе поскапе струјата. Наведувајќи ги инвестициите во енергетиката,  од ВМРО потенцираат дека во изминатите години инвестирале над 940 милиони евра,  што е двојно повеќе од сите влади на СДСМ. На ова СДСМ одговорија, дека Владата намерно не инвестирала во ниту еден капитален енергетски објект, за да може фамилијата да направи криминален увоз на скапа струја од речиси една милијарда евра. „Јавноста е сведок дека секој пат кога ВМРО-ДПМНЕ се обидува да најде алиби за поскапувањата, се повикува на настани од пред седум години и на лажното тврдење дека продажбата на ЕСМ е причина за денешното поскапување на струјата“, велат од СДСМ.