СДСМ: Рејтингот од Фич не е за пофалба, туку потврда на лошите економски политики

Добивај вести на Viber

СДСМ во денешното соопштение наведува дека кредитната агенција Фич ја остави Македонија во групата земји со проблематичен кредитен рејтинг, откако лани го намали кредитниот рејтинг на Македонија за едно ниво.

– Со ова се потврдени лошите економски политики во Македонија што ја оставија земјава и натаму ризична за кредитирање и со услови на повисоки камати поради таквиот статус. Кредитниот рејтинг на Македонија е спуштен уште во 2009 година. Тогаш прва кредитната агенција Стандард и Пурс го намали кредитниот рејтинг на земјава на ББ нивото, се наведува во соопштението.

Во 2013 година истата кредитна агенција, како што велат од СДСМ, повторно го намали кредитниот рејтинг на земјава на ББ – (минус), а минатата година и Фич го намали кредитниот рејтинг на Македонија на ББ.

Според СДСМ, сето ова е резултат на катастрофалните економски политики. 

-Така што неуспешна манипулација се оправдувањата дека загрозените економски перспективи на земјата се резултат на политичката криза, којашто е и создадена од власта за одржување на криминалните интереси, се наведува во соопштението од СДСМ.