СДСМ: ВМРО-ДПМНЕ посакува сценарио за судир меѓу граѓаните

Добивај вести на Viber

Откако синоќа слушнавме говор на омраза употребн од страна на одредени политички функционери, опозицијата повикува граѓаните да не подлегнуваат на провокациите.

„Синоќа бевме сведоци на фашистички изјави пред ДИК кои покажуваат дека раководството на ВМРО-ДПМНЕ посакува сценарио за судир меѓу граѓаните, за Груевски да си ја спаси сопствената кожа. Тоа нема да им помине. Граѓаните на Македонија не се ничие топовско место. Нема да подлегнат на провокациите“, реагираат од партијата на Зоран Заев.

СДСМ ги повика сите што гласаа за промени, но и на оние кои беа приморани својот глас да го дадат за режимот, да не подлегнуваат на провокации. 

„Граѓаните да останат спокојни зашто режимот заминува, а државата и институциите ќе бидат целосно ослободени. Никола Груевски веднаш да престане да ја носи Македонија кон граѓански судир. Нема да дозволиме мирот и безбедноста на земјата да бидат ставени во заложништво на Груевски и неговата фамилија затоа што се уплашени од одговорност за злосторствата што ги имаат направено“, велат оттаму.

Меѓудругото од СДМС велат дека процесот процесот на пребројување и прегласување е важен дел од едни демократски избори поради што ВМРО-ДПМНЕ треба да престане да врши притисок врз ДИК, а таа институција да остане доследна на законските процедури.