Се бара притвор за Андреа Поповски, криел вработена дека е на работа додека одела на митинзи
Објавено во: Македонија 07 Август, 2019
Основното јавно обвинителство побара притвор за Андреа Поповски, поранешниот в.д. директор на Централниот регистар, затоа што тој и уште четворица од оваа институција и овозможиле на вработена да се евидентира како да е на работа и да ги извршува работните задачи додека таа две и пол години земала учество на митинзи и партиски настани.
Поповски беше уаосен вчера, а против него и уште петмина од ОЈО е дадена наредба за спроведување истражна постапка. Тој се сомничи за злоупотреба на службената положба и овластување, а останатите четири лица за помагање при извршување на истото кривично дело.
„Во периодот од 16.12.2014 година до 29.05.2017 година, првоосомничениот во својство на вршител на должноста директор на Централниот регистар, со пречекорување на границите на своето службено овластување, усно наредил една вработена да биде евидентирана како редовно присутна на работа во месечните листи кои ги изготвувало Одделението за човечки ресурси, иако бил свесен дека цело време вработената воопшто нема да доаѓа на работа, туку ќе биде ангажирана за партиски активности на една политичка партија.
Спротивно на законските акти и правилниците на Централниот регистар, таквата листа била доставувана до Одделението за финансиско-сметководствени работи и врз основа на тоа на вработената неосновано и била исплаќана плата и придонеси на плата, со што била нанесена значителна штета на буџетот на институцијата. Останатите четворица вработени, од кои тројца од Одделението за човечки ресурси на Централниот регистар и едно одговорно лице за работењето на Регионалната регистрациона канцеларија – Скопје, се осомничени дека со умисла му помогнале на в.д. директорот во извршувањето на кривичното дело“, се вели во соопштението на обвинението.
За Поповски е побарано од судот да обезбеди притвор, а за тројца од четворицата понагачи се бараат мерки на претпазливост за да се обезбеди нивното присуство во текот на кривичната постапка.