Се гради, а не се продава – „Паѓаат“ цените на становите во Скопје

Добивај вести на Viber

Цените на становите во Македонија ќе се намалуваат, затоа што голем е бројот на новоизградени станови во Скопје. Најголем дел од непродадените станови во Скопје се во општините Аеродром, Центар и Kарпош. Последниве две години забележан е пад на побарувачката на станови, а зголемен е бројот на новоградби на станбен простор.

Според Државниот завод за статистика лани цените на становите „паднале“ за речиси 5 отсто. Тој тренд е регистриран и годинава.

Во просек, денес цените на становите во скопската општина Центар се околу 1.200 евра за еден квадратен метар, а во Аеродорм околу 900 евра за квадрат.

Изградбата на карабината на двата облакодера со по 42 ката во населбата Аеродром во Скопје, кои ги гради турската компанија „Џеваир Холдинг” веќе е при крај. Од компанијата најавувааат дека во август ќе почне продажбата на станови во овој станбен комплекс. Темелите и плочата се поставени и за вторите два солитера. Првите две згради ќе бидат вселиви до почетокот на 2015 година.

Во секоја кула ќе има по 344 стана или вкупно 1.376 станови и во нив ќе живеат 6.000 луѓе.

Во домашните агенции на недвижности велат дека очекувањата на купувачите за драстични поместувања не се реални. Подолго од една година понудата е поголема од побарувачката, а трендот ги зафаќа и новоградбите и старите станови и куќи. Летото е период во кој купопродажбите на недвижности се зголемуваат, па агенциите очекуваат поголемо раздвижување и намалување на разликата меѓу понудата и побарувачката.