Се окрупнува „фронт“ против новите давачки за музика

Добивај вести на Viber

Здружението на приватните медиуми на Република Македонија (ЗПММ) започнаа со предвидените активности, договорени на средбите со членството, со кои треба да се најде начин да се спрели новата давачка за емитување музика, која ќе нанесе огромен удар врз сите медиуми. Но, штета ќе трпат и хотелиерите, но и сите, од најмали до најголеми бизниси, кои во оваа ситуација во која е моментно целото стопанство ќе треба да издвојуваат значителни средства и за оваа намена. Со тарифникот на старо-новото зддружение ММИ се опфатени сите фирми во државата. Веќе за наредната недела е најавено окрупнување на „фронтот“ против новите трошоци за користење на музиката, велат од ЗПММ. Правната служба ангажирана од здружението на ЗПММ работи на сите аспекти на проблемот, а не се исклучува и правна разврска на проблемот со ММИ во највисоките правни инстанци во земјата, односно во судовите. Вчера, претставници на здружението остварија средба со првиот човек на Советот за радиодифузија Зоран Трајчевски, пред кого беше презентирано здружението, целите и дел од планираните активности за наредниот период. - Медиумите се среќаваат со многу предизвици во овој период. Случајот со ММИ е само капката која ја прели чашата и која не натера да се обединиме и заеднички да побараме решение за овој, но и за сите други наталожени проблеми со кои се среќаваме секојдневно. Доколку се согласиме со новонастанатата состојба ќе стигнеме до околу 10% од комплетниот приход кој ќе треба да го издвоиме за оваа намена. Ако на тоа се додадат и средствата кои сите медиуми наскоро ќе ги издвојуваат за користење на услугите на дигиталниот оператор кој ќе стартува со работа од јуни следната година, но и големиот број на компензации кои медиумите се приморани да ги прифаќаат, стигнуваме до фантастични бројки кои ќе се едноставно неиздржливи, вели претседателот на ЗПММ Сашо Митаноски.