(ФОТО) СЕ УШТЕ ГОРИ ВО ЧУЧЕР САНДЕВО, ГРАДОНАЧАЛНИКОТ ВЕЛИ СОСТОЈБАТА Е ЛОША: Мирисот на чад синоќа пристигна и до Бутел, Чаир и Железара

Добивај вести на Viber

Активните се пожарите во Општина Прилеп – с. Бешиште (приземен пожар во мешана шума), Општина Македонски Брод – помеѓу с. Црешнево и с. Слатин (деградирана дабова шума и грмушки), Општина Чашка – под Солунска глава, меѓу Изворите на Бабуна и Бабина дупка (само чад, карпест терен), Општина Чучер Сандево – помеѓу с. Блаце и с. Чучер (мешана шума и ниска вегетација), Општина Шуто Оризари – Њу Стар Хотел (депонија), Општина Дојран – с. Николич (нискостеблеста шума) и Општина Крива Паланка – с. Жидилово (борова шума)

Фактор утринава го контактираше градоначалникот на Чучер Сандево, Сашо Комненовиќ, за тоа каква е состојбата со пожарот, тој накратко ни одговори дека состојбата е лоша.,

„Состојбата е лоша, се сомневам дека пожарите се подметнати, ова не е нормално. Сега екипите го изгаснаа пожарот во Кучевиште, кај црквата Света Недела, се гледа од улица дека е запалено. Гореше ливада. Пожарот кај Блаце-Бразда се уште е активен и како растат температурите така се зголемуа интензитетот. Хеликоптерот е активен во гасење, но како расте температурата и тој ќе мора да се повлече бидејќи на температура над 45 степени не може да лета. Далеку е од населените места, синоќа од таа страна беше локализиран. Меѓутоа далеку од тоа дека состојбата е добра, ние сме цела ноќ на терен, не сме отишле дома, вели градоначалникот Комненовиќ.

Инаку, потресни сведоштва и фотографии пристигнуваат од социјалните мрежи, а мирисот на чад синоќа ги вознемири и жителите на Чаир, Бутел и Железара.

Со помош синоќа излегоа и од општина Карпош и Центар.

„На барање на градоначалникот на Чучер Сандево за помош при справувањето со пожарот кај Блаце кој во текот на вечерните часови почна брзо да се шири и излезе од контрола, градоначалникот Стевчо Јакимовски итно го мобилизираше тимот за заштита и спасување на Општина Карпош и го испрати на помош. Екипата се повлече од терен во два часот по полноќ“, соопштија од општината.

„Општина Центар, со цистерна и вработени од ПОЦ, се вклучи во гаснењето на пожарот во Чучер Сандево.

 Дејствуваме координирано и остануваме подготвени да помогнеме сѐ додека огнот не биде ставен под контрола.

Приоритет е безбедноста на граѓаните и заштитата на природата!“ информираа од Центар.

Со критики до власта се јавија и од СДСМ. Велат дека Владата ги оставила граѓаните сами против пожарите, и дека импровизацијата на Мицкоски скапо ја чини Македонија.

Од ЦУК информираа дека локализиран е пожарот во Општина Делчево – градска депонија, а под контрола е пожарот во Општина Македонски Брод – с. Самаково (лесно запалив материјал).

Според ЦУК, изгаснати се пожарите во Сарај – с. Глумово (пилевина), Петровец – с. Ржаничино (стрниште), Аеродром – с. Долно Лисиче (фолии и стрниште), Ѓорче Петров 1 – с. Злокоќани (ниска вегетација), Ѓорче Петров 2 – ул. Стево Црвенковски бб (ниска вегетација), Чучер Сандево – м.в. Голиево (ниска вегетација), Центар – ул. Лазар Личеноски (ниска вегетација), Велес – с. Горно Оризари (ниска вегетација), Куманово – с. Белаковце (шума, ниска вегетација), Старо Нагоричане 1 – с. Ругинце (ниска вегетација и мешана шума), Старо Нагоричане 2 – с. Ругинце (нискостеблеста шума), Кратово – с. Железница (лозје), Штип – с. Балвани (ниска вегетација), Долнени – с. Сарандиво (ниска вегетација), Боговиње – с. Седларце (депонија), Брвеница – с. Теново (ниска вегетација), Желино – с. Чефлик (ниска вегетација), Врапчиште – с. Неготино (стрниште), Битола 1 – с. Магленце (депонија), Битола 2 – близина на болницата Плодност (ниска вегетација), Свети Николе – правец Штип – Велес (ниска вегетација), Прилеп 1 – м.в. Жабино маало (ниска вегетација) и Прилеп 2 – кај фирмата Гаро-Градба (ниска вегетација и депонија).

Фото: Филип Тодороф/Фејсбук