Шпанските банки со преполовен профит

Добивај вести на Viber

Шпанските банки продолжуваат да бележат загуби поради расчистување на лошите кредити поврзани со секторот на имот, а на што инсистира Владата. Од денеска, во наредните неколку недели ќе се разјасни и точно колкави се загубите, бидејќи финансиските институции сега почнуваат да објавуваат извештаи за третиот квартал, пренесува Ројтерс. Прва извештајот ќе го објави „Bankinter“. Според прогнозите, нето добивката на оваа финансиска институција ќе биде преполовена иако банката не е толку изложена на влијанието на секторот на имотите, колку што се нејзините конкуренти. Агенцијата потсетува дека во моментов европските партнери на Мадрид подготвуваат специјална финансиска помош за банкарскиот сектор во Шпанија. Ревизијата на финансиските институции во земјата покажа дека недостатокот на капитал изнесува околу 60 милијарди евра. Европските власти ветија дека ќе им дадат на шпанските банки околу 100 милијарди евра. Шпанија го обврза банкарскиот сектор да одвои вкупно 137 милијарди евра за да ги покрие загубите. Според аналитичарите секоја банка ќе добие индивидуален распоред за да ги исполни новите капитални барања и потребите од дополнителни провизии, како и да ги отпише загубите од средствата поврзани со секторот на имотите. Се очекува процесот на отпишување на проблематичните средства од билансот на шпанските финансиски институции да заврши кон крајот на декември. За банките кои се во процес на спојување, рокот најверојатно ќе биде продолжен до почетокот на 2013 година.