Шпаркасе Банка стипендира студенти, ќе ги праќа на специјализација во Грац

Добивај вести на Viber

Шпаркасе Банка и Штаермеркише Шпаркасе во соработка со Универзитетот во Грац им нуди можност за доделување едногодишни стипендии за усовршување и стажирање на студенти и дипломирани лица од економскиот и правниот факултет во Скопје. Станува збор за програмата „Најдобрите од Југоистокот“, за која може да конкурираат најдобрите  студенти и дипломирани лица од областа на економијата и правните науки, од Македонија, Словенија, Хрватска, Босна и Херцеговина, Србија и Црна Гора. Целта на програмата е да се унапреди образованието, меѓународно искуство и влезот во професионалниот свет на студентите и дипломираните кадри, велат од раководството на Шпаркасе Банка. „Програмата за стипендирање и соработката што ја имаме со Економскиот факултет покажа одлични резултати. Воспоставениот механизам за размена на знаење, искуства  и информации се покажа повеќе од успешен Преку проширување на соработката со Универзитетот и вклучување на правниот факултет „Јустинијан Први“, настојуваме уште повеќе да помогнеме во поддршката на образованието и неговата промоција. Им обезбедуваме можност за афирмација на поголема група млади и талентирани личности и секако, нивно усовршување и заокружување на процесот на едукација“, изјави Саша Боко, член на Управниот одбор на Шпаркасе Банка. Рокот за доставување на сите апликации е 8 март 2013 година. Право на учество во финалниот избор во Грац имаат тројцата победници од секоја од земјите учеснички кои се бираат врз основа на воспоставени критериуми и ќе бидат познати во април годинава. На крајот, од сите нив, во мај ќе бидат избрани 10-те победници кои добиваат стипендии за обука или стажирање во траење од една година во Грац, Австрија. На тројцата финалисти од Македонија, ќе им се доделат дополнителни награди од страна на Банката, сооштија од Шпаркасе Банка.