ШТЕДАЧИТЕ ОД ЕУРОСТАНДАРД БАНКА НЕ СИ ПОВЛЕКЛЕ 5,5 МИЛИОНИ ЕВРА - парите во септември се враќаат кај Фондот, еве што треба да знаат депонентите

Добивај вести на Viber

Поминуваат трите години во кои четири македонски банки вршеа исплата на обесштетувањето на штедачите од Еуростандард банка, чии депозити беа до 30 илјади евра.

Исплатата ја вршеше Фондот за осигурување на депозити, но преку четири банки со кои соработуваше, а на средината на септември тој процес ќе се финализира, односно обесштетувањето веќе нема да се реализира преку четирите банки исплатувачи. 

Но, од оние пари кои беа предвидени и издвоени за обесштетување, а тоа беа вкупно 68 милиони евра, штедачите сеуште не си повлекле 5,5 милиони евра, и веќе во септември тие пари ќе си ги поврарти Фондот за осигурување на депозити.

Ова значи дека станува збор за прилично солидна сума пари која дел од штедачите не си ја подигнале, иако тоа можеа да го сторат во секое време преку четирите банки исплатувачи. Главно станува збор за мали влогови, за кои на штедачите не им се исплатело да ја тераат постапката за обесштетување.

Затоа овие средства сега ќе си ги поврати Фондот за осигурување на депозити, а тоа е наведено и во Финансискиот план на Фондот за оваа година.  

„Дополнително, во септември 2023 година, поради завршување на договорната обврска со банките исплатувачи на депоненти од Еуростандард банка, се очекува да се изврши поврат на неисплатените средства за исплата на обесштетување на депонентите од Еуростандард банка кои беа дозначени од Фондот за осигурување на депозити во четирите банки исплатувачи, во износ од 339 милиони денари (5,5 милиони евра – н.з.)“, се вели во Финансискипот план на ФОД за оваа година.

После 15 септември, доколку некој штедач сеуште ќе сака да си земе од своите заробени депозити, за тоа веќе нема да оди во банка, туку ќе треба да оди директно во Фондот за осигурување на депозити.

Имено, обесштетувањето на штедачите од Еуростандард до 30 илјади евра почна на 15 септември 2020 година, и таа се вршеше преку четири деловни банки, односно Комерцијална, НЛБ Банка, Стопанска банка Скопје и Халк Банка.

Од Фондот тогаш јасно кажаа дека секој депонент ќе има на располагање 36 месеци, односно 3 години од денот на почеток на исплатата, за кога ќе биде во можност да го оствари своето право на обесштетување во банките-исплатувачи.

„По истекот на овој временски период (три години), депонентите односно нивните наследници кои од различни причини не можеле да го остварат своето право на обесштетување во банките - исплатувачи, исплатата на обесштетување ќе може да ја остварат преку Фондот за осигурување на депозити кој ќе обезбеди обесштетување независно од тоа кога депонентот ќе достави барање за остварување на своето право на обесштетување“, нагласија пред три години од ФОД во своето соопштение.

Инаку, во февруари минатата година Фондот за осигурување на депозити на јавноста и соопшти дека тие во целокупната постапка на стечај на Еуростандард банка, ја одиграле најважната улога, а тоа е исплата на обесштетувањето на депонентите – физички лица на пропаднатата банка.

„Од 15 септември 2020 година кога започна исплатата на обештетувањето на депонентите на Еуростандард банка и до денес има исплатено 90,5 отсто од вкупно пресметаното обесштетување. Покрај оваа исплата која сѐ уште се одвива преку 4 банки исплатувачи, Фондот работи и на исплата на наследниците на депоненти кои починале. До сега се обработени преку 300 случаи на исплати на наследници“, се нагласуваше во соопштението.

ФОД има статус на доверител во стечајната маса на Еуростандард банка. За исплата на обесштетување на депонентите со право на обесштетување, Фондот издвои вкупно 4,2 милијарди денари или 68 милиони евра. Уставниот суд во мај 2021 година, донесе Одлука со која се укина член 163 став 3 од Законот за банките, со што ФОД го загуби правото на приоритетна наплата на своето побарување од стечајната маса на банката или штедилницата за која е отворена стечајна или ликвидациона постапка.

Инаку, во својот план Фондот наведува дека и годинава од своите членки, односно банките и штедилниците наплаќа стапка од 0,25 отсто годишно од вкупните депозити на население, иако согласно Законот за ФОД оваа стапка може да изнесува најмногу 0,7 отсто годишно од вкупните депозити во секоја банка, што значи три пати повеќе од сегашната премија што ја плаќаат банките.

А, оваа година ФОД очекува премијата да му изнесува 13,8 милиони евра, и со овие пари Фондот ќе купува државни записи. Со оглед што нивните камати поради инфлацијата како и сите други камати растат, Фондот оваа година ќе има многу поголема добивка во однос на ланската година, плус парите што ќе се вратат од обесштетувањето на Еуростандард.  

Фондот за осигурување на депозити годинава се очекува да се оствари нето добивка во износ од 419.412 илјади денари ( 6,8 милиони евра – н.з.), што во однос на претходната година е зголемување на добивката за дури 444,46 отсто, односно има енормно зголемување на добивката на оваа институција.

 „Нето добивката која се очекува да се оствари во 2023 година ќе биде распределена во ‘резервите за сигурност’ на Фондот заради зголемување на финансиската сила на Фондот, со што се овозможува поголема сигурност и доверба кај депонентите“, се вели во финансискиот план на Фондот.

Н.Н.Ф.