Што договорија денеска МВР и полицискиот синдикат?

Добивај вести на Viber

Министерот за внатрешни работи, Оливер Спасовски и претседателот на Македонскиот полициски синдикат, Тихомир Климовски денеска потпишаа измени на Колективниот договор на Министерството за внатрешни работи со кои се подобруваат условите за работа на работниците со непрекинат престој во одредени издвоени објекти на МВР.

- Согласно постојното решение, работењето е организирано така што работното време е во траење од најмалку 12 часа редовна работа и 12 часа одмор на работникот во објектот, а за секои 24 часа непрекинат престој му следува еден слободен ден. Ваквата регулатива предизвика големо незадоволство кај работниците кои работат во овие објекти и до мене, како министер, стигнаа голем број на реакции и барања да се направат корекции, изјави денеска Министерот Спасовски. 

- По извршените анализи, утврдивме решенија за надминување на проблемите и тие се содржани во спогодбата за изменување и дополнување на Колективниот договор на МВР, која ја потпишавме денеска со репрезентативниот синдикат. Според новото решение, работењето е организирано така што работното време е во траење од најмалку 12 часа редовна работа и 12 часа платен одмор на работникот во објектот, а за секои 24 часа непрекинат престој му следува три слободни денови, додаде Спасовски.

Претседателот на МПС, Тихомир Климовски исто така ги поздрави измените со кои се подобруваат условите за работа на вработените во МВР.

- Решението кое беше со последниот колективен договор предизвика незадоволство кај нашите колеги и на барање на нашето членство се пристапи кон измена на ова решение. Денеска сме сведоци на чинот на измена на колективниот договор, рече Климовски.