Што ги кутна цените на недвижнините: Најголем пад во последните три години

Добивај вести на Viber

Значаен пад на цените на недвижнините во третото тромесечје годинава. Ако се споредува со вториот квартал становите поевтиниле за дури 3,9 проценти што е најзначен квартален пад во последните три години. Сепак на годишна основа цените на недвижнините бележат раст од четири проценти. 

Падот регистриран на крајот на септември секако може да се должи и на високата основа од претходниот квартал, односно значајниот раст на цените регистриран во вториот квартал, кога недвижнините поскапеле за дури шест проценти. Податоците кои ги објавува Народната банка покажуваат дека годинава на крајот на септември цените на недвижнините се за речиси четири проценти пониски во однос на 2010 година.

Во меѓувреме податоците од терен покажуваат дека нема значајна промена во побарувачката за недвижнини. И покрај тоа што, особено во главниот град има доста и непродадени станови, постојано расте изградбата на нови станови.

Според Државниот завод за статистика во октомври 2019 година се издадени 308 одобренија за градење, што е за над 11 отсто повеќе во однос на истиот месец од претходната година.

Од вкупниот број на издадени одобренија за градење, 151 или половината се за објекти од високоградба, а најчесто или во 58 отсто од случаите инвеститори се физички лица.

Според статистика во овој период предвидена е изградба на 562 станови.