Што и стори гласањето за уставните измени на берзата?
Објавено во: Економија 22 Октомври, 2018
Значаен раст на цените на акциите на Македонска берза денеска. Индексот на МБИ 10 до моментов има раст од над 5,7 проценти, а во „зелено“ се цените на акциите на повеќето компании. Некои до нив забележале до сега раст од десет проценти. Ова е прв ден на тргување на берзата откако во петокот вечерта Парламентот даде зелено светло за Уставните измени со кои како што се тврди, ќе се одблокира евроинтегративниот процес во земјата.
За дел од аналитичарите ова е една од причините за зголемениот интерес за акциите и за растот на цените. Сепак велат дека фундаментот се добрите финансиски резултати на компаниите. Затоа, се очекува овој нагорен тренд да продолжи.
„Цените на акциите во земјава дефинитивно се потценети, а имавме најдобар семестар во посоледните 10 години, ако се анализира по финансиските извештаи на компаниите. Од друга страна, Народната банка уште ги држи ниски каматните стапки па инвестирањето е поатрактивно. Очекуваме прилив на странски директни инвестиции кои повеќето би влегле и преку берза. Има инвеститори, има добри прилики, добри профити и добри биланси. Во наредна година очекуваме силен влез на вложувачи на Македонска берза, вели Васко Митев, Илирика Инвестмент.
Сепак дел од расположението на берзата денеска секако се должи на случувањата на политички план. Денеска над 90 отсто од прометот е направен од домашни инвеститори, кои што купуваат на позитивен сентимент.
А.Т.