Што одлучи Извршниот комитет на ВМРО-ДПМНЕ за преговорите?
Објавено во: Македонија 11 Јануари, 2017
ВМРО-ДПМНЕ и Коалицијата „За подобра Македонија“ освоија најголем број на гласови од граѓаните и императив е да се почитува волјата на мнозинството, беше заклучено на Извршниот комитет на ВМРО-ДПМНЕ.
Седница се одржа денеска и со неа раководеше лидерот на ВМРО-ДПМНЕ, Никола Груевски.
„Извршниот комитет на ВМРО-ДПМНЕ даде полн легитимитет на претседателот Груевски за отпочнување разговори за состав на новата Влада, кои треба да се водат на принципиелни основи, запазувајќи ги државните интереси. Во анализата на изборните резултати, беше заклучено дека граѓаните на овие избори го поразија СДСМ и испратија јасна порака дека не прифаќаат политика на деструкција и партија чие раководство функционира според мафијашки принципи“ - наведуваат од партијата.
Од ВМРО-ДПМНЕ додаваат дека потребна е политичка стабилизација за продолжување на економскиот напредок, за што е неопходно составување на влада која ќе биде фокусирана кон исполнување на реалните потреби и барања на граѓаните.