ЕЛЕМ за „Фактор“: Денес ќе го раскинеме договорот со синот на Мира Стојчевска

Добивај вести на Viber

Синот на пратеничката Мира Стoјчевска, Виктор Стојчевски, денеска го поднесе актот за спогодбено раскинување на работниот однос со АД ЕЛЕМ, потврдија од компанијата за „Фактор“.

- Актот е во правна процедура и до крајот на денот тоа ќе се ефектуира. Ќе го потпише генералниот директор на компанијата, или доколку е отсутен, тоа ќе го стори неговиот заменик - ни потврдија од Електрани на Македонија.

Синот на Стојчевска ова го најави уште пред велигденските празници и нагласи дека ќе го стори од морални причини после одлуката на Комисијата за спречување на корупцијата која потврди дека неговото вработување во АД ЕЛЕМ е спорно.

По отворениот случај во Антикорупциска, премиерот Зоран Заев ги повика сите пратеници за кои беа отворени предмети да ги повлечат своите блиски од нивните работни места., Генералниот секретар на СДСМ, Александар Кирацовски, веќе објави дека неговата сестра и мајката на неговата сопруга ќе си дадат отказ.

Стојчевски беше вработен на местото инжинер за нови технологии, а од АД ЕЛЕМ тврдеа дека тој ги исполнувал критериумите од огласот.