Сирија им даде зелено светло на Американците за воздушните напади на нејзина територија

Добивај вести на Viber

Сирискиот претседател Башар ал-Асад дава зелено светло за нападите на меѓународната коалиција предводена од САД врз џихадистичката Исламска држава на сириска територија. Сириското Министерство за надворешни работи денеска соопшти дека ги поддржува „сите меѓународни напори“ во борбата против џихадистите од Исламската држава и Фронтот ал-Нусра. „Сирија ги поддржува сите меѓународни напори за борба против тероризмот на Исламската држава и Ал-Нусра, инсистирајќи на почитување на националниот суверенитет и меѓународните закони“, стои во соопштението. Претходно, сириското МНР објави дека САД ги известиле властите во Дамаск за планираниот напад. „Американците вчера го информирале претставникот на Сирија во ОН дека ќе започнат операции против терористичката организација Исламска држава во Рака“, наведе сириското министерство. Пентагон прецизираше дека во 50 воздушни напади утрово учествувале авиони ловци, бомбардери и ракети „Томахавк“ од воени бродови во Црвеното Море и Персискиот Залив. Според првичните информации, во нападите учествувале и пет партнерски арапски земји - Јордан, Бахреин, Катар, Саудиска Арабија и Обединетите Арапски Емирати, од кои Јордан веќе го потврди своето учество. Ова е првпат САД и Сирија да се на иста страна по заладените односи меѓу двете земји, поради отворените критики на Вашингтон за режимот на Башар ал-Асад. Рускиот претседател Владимир Путин денеска истакна дека за секој напад на сириска територија мора да бидат известени сириските власти и тие да дадат согласност за него. Путин утрово за воздушните напади врз позиции на Исламската држава во Сирија телефонски разговарал и со генералниот секретар на Обединетите нации Бан Ки-мун. „Владата на Сирија мора да биде известена за нападите. За изведување на вакви напади треба да се добие дозвола од Владата на Сирија“, го истакнал Путин ставот на официјална Москва. Во утринските напади врз цели во Сирија, според првичните информации, биле ликвидирани најмалку 30-тина припадници на радикалната Исламска држава.