Скопје ќе се гасифицира со партнерство

Добивај вести на Viber

Учество во јавно – приватно партнерство за изградба на идниот систем за дистрибуција на природен гас и за управување со дистрибуцијата на природен гас на територијата на главниот град, ова е огласот преку кој  Градот Скопје бара концесионер за гасификацискиот систем. Начинот и условите за реализација на долгонајавуваниот проект за гасификација на Скопје дополнително ќе се утврдуваат во соработка со компаниите што ќе достават писмо за интерес најдоцна до 21 декември. Според информациите наведени во јавното известување, локалната власт планира да ја изведе секундарната гасоводна мрежа и дистрибуцијата на енергенсот до потрошувачите по пат на доделување на концесија во временски период кој сеуште не е определен. Во изготвената студија од Градот Скопје се наведува дека вкупната инвестиција за реализација на дистрибутивната мрежа би изнесувала околу 40 милиони евра, финансиски средства кои ќе треба да ги обезбеди идниот приватен инвеститор што ќе ја добие концесијата во соработка со градската управа. На територијата на Скопје веќе постојат две мерни станици на магистралниот гасовод кај фабриката „Охис“ и кај скопската Железарница.