Добивај вести на Viber
Вкупно пет милиони евра должи општината Центар на банките, за кредити за изградба на двете катни гаражи кај Судска палата и Нова Македонија, но неисплатливоста на објектите ја усложнува финансиската состојба на општината.
Иако идејата на општинарите беше кредитите да се враќаат, дел со продажбата на деловните простории, дел од продадените карти за паркинг, овој план речиси и да не успеја со катната гаржа кај Судска палата, за која што општината се задолжи со банкарски кредит од 2,5 милиони евра. Деловните простории зафaќаат 15 отсто од гаражата и досега се покажаа како неатрактивни. На првите два огласа само мал дел од просториите се продадоа. Третиот оглас за продажба се поништи, бидејќи имало катастерски проблеми во некои од документите. Некои од советниците уште на првиот оглас коментираа дека нема да успее продажбата поради нестручниот градежен проект за изградба на гаражата. Гаражата е со капацитет од 500 паркинг места и треба да биде готова овој месец. Нејзината фасада е во неокласицистички стил, односно во склоп на проектот Скопје 2014.
На истиот принцип, општината планира да го враќа и кредитот од 3 милиони евра земен за изградба на новата катна гаража кај „Нова Македонија“. И оваа гаража како и онаа кај Судска палата ќе биде со барокна фасада. Деновиве Центар распиша јавен оглас за избор на изведувач . Гаражата е предвидено да се изгради на површина од 7.190 квадратни метри, од кои 6.112 квадратни метри ќе бидат наменети за паркирање, а 1.078 за деловен простор. Допрва ќе се види дали деловните простории во оваа гаража ќе бидат попривлечни за разлика од тие кај Судска палата. И покрај неможноста за продажба на комерцијалниот дел од гаражите, од Центар најавуваат дека и понатаму ќе инвестирале во објекти кои го решаваат проблемот со паркирање во главниот град.