СЛУЖБЕНО ВОЗИЛО И 2.500 ЕВРА МЕСЕЧНО ЗА КОВАЧЕВСКИ - експремиерот доби апанажа, исто толку и ексминистерот за внатрешни

Добивај вести на Viber

Цела година од престанокот на функцијата сега веќе поранешниот премиер Димитар Ковачевски и поранешниот министер за внатрешни работи, Оливер Спасовски ќе добиваат по 2.500 евра на своите сметки. 

Имено, на нивно барање, Комисијата за избори и именување во Собранието, под точка „разно“, ги усвои, односно ги прифати барањата да добијат апанажа.

Апанажата или надоместокот е во висина на платата што именуваното лице ја добивало додека било на функцијата, а тоа значи дека и двајцата цела година ќе добиваат по 2.500 евра месечно.

Како што пишува Блумберг Адриа, единствено пратеници од СДСМ биле присутни во салата, а со седум гласа „за“ и без никаква дискусија биле усвоени решенијата.

-  Поранешниот претседател на Владата, Димитар Ковачевски кому функцијата му престана поради избор на преодна Влада, поднесе барање за остварување на плата по престанок на функцијата. И поранешниот министер Оливер Спасовски на кого функцијата му престана согласно Законот за Влада, поднесе барање за остварување на плата по престанок на фукцијата - рече претседателката на Комисијата, Марија Георгиевска и ги стави предлозите на гласање.

Покрај правото на апанажа, Ковачевски побарал и добил право на користење службено возило, кое му следува во согласност со Законот за возила.

Освен експремиерот и поранешниот министер за внатрешни работи, апанажа ќе добиваат и Весна Бендевска од Комисија за заштита од дискриминација, како и Исмаљ Камбери од Комисија за заштита од дискриминација.