Со европски фондови од Хрватска и Словенија – до повеќе азиски туристи во Македонија

Добивај вести на Viber

Македонија може да има големи придобивки од иницијативата на претседателите на Словенија и на Хрватска, Борут Пахор и Иво Јосиповиќ. Станува збор за проектот за туристичка соработка кој што го предложи претседателот Иво Јосиповиќ, а веднаш го прифати и неговиот словенечки колега Борис Пахор. Имено, идејата на Јосиповиќ е двете земји со силни финансиски средства од фондовите на ЕУ координирано и решително да настапат на „трети пазари“, особено во Азија. Целта би била со разработен и ефикасен туристичко-промотивен модел да се привлекуваат туристи од Азија, кои сега се најпосакувани гости во регионот и на регионалната туристичка мапа, пишува Нова Македонија. Двајцата претседатели веднаш се согласиле дека во тој проект најдобар партнер би можела да им биде Македонија, не само како пријателска држава туку и како комплементарен туристички фактор со чии вредности проектот би бил уште поконкретен. Така според Јосиповиќ, туристите од Азија, кои сѐ помасовно заминуваат на одмор и туристички тури, всушност немаат јасна цел во која држава конкретно одат или би оделе, туку за нив единствено валидна и посакувана дестинација е „Европа“ како „Европа“. Други дистинкции тие не прават, вели тој, па токму поради тоа е битно Хрватска и Словенија, заедно со Македонија и моќните ЕУ-фондови, колку што е можно побрзо да ги насочат туристите од Азија токму на јадранскиот брег, односно на словенечките и на македонските планини и езера.