Стефанова: Не е точно дека имало претрес во мојот дом, не стравувам за својата иднина

Обвинителката oд Специјалното јавно обвинителство, Лиле Стефанова на денешната прес - конференција, ги отфрли информациите дека имало претрес во нејзиниот дом, додавајќи дека не стравува за својата иднина.

„Не е точно дека имало претрес во мојот дом. Не стравувам за својата иднина и нема зошто да бидам инволвирана. Не знам дали Јанева треба да стравува“, изјави Стефанова.

Специјалната јавна обвинителката Катица Јанева вчера поднесе оставка, а се појавија и информации дека полицијата вршела претрес и во домот на Стефанова.

Стефанова во изјава за медиумите рече дека нема потпишано ниту една одлука за пуштање од притвор за осомничено лице, ниту пак за враќање на патните исправи.

„Сите одлуки секој спис кој ќе излезе единствено го потпишува Јанева и кога е отсутна овластува некој од обвинителите. Јас немам потпишано ниту една одлука ни за пуштање во куќен притвор, ни за давање на патните исправи на Панделевски", рече Стефанова.

За тоа дали Јанева стравува за отворената истрага „Рекет“ од вчера, Стеванова ги упати медиумите да ја прашаат обвинителката дали таа стравува за таа истрага.