Стопанска банка секој месец издвојува по милион евра за своите вработени

Добивај вести на Viber

Стопанска банка АД Скопје, во првите шест месеци од годинава, остварила профит од 8 милиони евра, покажуваат неревидираните биланси кои банката ги објави денеска. Во споредба со истиот период лани, нето добивката на банката, годинава, е поголема за речиси 2 милиони евра. Голема е и разликата прикажана преку добивката по акција, прикажана во билансот на банката. Годинава, за првите шест месеци, секоја акција од банката на нејзиниот сопственик му носи новосоздадена вредност од 28,4 денари, што е дури 6,4 денари односно, 29 отсто повеќе од истиот период лани. Најголемиот нето приход банката го направила од каматите што ги наплаќа на кредитите и по таа основа инкасирала нето 1,378 милијарди денари (22,37 милиони евра) за првите шест месеци. Вкупно бруто приходот од камати годинава за првите шест месеци изнесува 2,3 милијарди денари (37,5 милиони евра). За првите шест месеци оваа банка значајно ги зголемила средствата што ги чува во државни обврзници и таму вложила нови 100 милиони евра. Банката го зголемила кредитирањето за безмалку 20 милиони евра во споредба со првото полугодие лани, но истовремено ја зголемила и депозитната база која пораснала за 30 милиони евра во споредба со истиот период лани кога изнесувала 970 милиони евра. Најголема ставка на расходната страна на банката за овој период се резервациите за сомнителни побарувања и тие изнесуваат 507,5 милиони денари (над 8,3 милиони евра). Но во споредба со лани, тие средства се пониски за 50 милиони денари. Втора по големина расходна ставка се платите и придонесите за вработените и таа ставка изнесува 364,3 милиони денари (односно 6 милиони евра), што значи дека оваа банка за плати и придонеси месечно издвојува по 1 милион евра за своите вработени.